Латвія ўводзіць рэжым надзвычайнага становішча на тры месяцы

Сітуацыя ў Латвіі цяжкая праз значную колькасць непрышчэпленых людзей, а гэта ўплывае на сістэму аховы здароўя, мяркуюць ва ўрадзе краіны, піша korrespondent.net.

У Латвіі Савет па крызісным кіраванні прыняў рашэнне абвясціць у краіне надзвычайнае становішча тэрмінам на тры месяцы з-за распаўсюджвання каронавіруснай інфекцыі.

«Інтэрфакс-Украіна» адзначае, што кіраўнік урада краіны Крыш'яніс Карыньш патлумачыў: мэта ўвядзення надзвычайнага становішча — «павысіць ахоп вакцынацыяй, увёсці значна больш строгія абмежаванні для непрышчэпленых».

Прэм'ер падкрэсліў, што сітуацыя ў Латвіі цяжкая і ў бальніцах імкліва расце колькасць пацыентаў з COVID-19, што абмяжоўвае магчымасці медустаноў аказваць усе паслугі.

«Мы паўтара года змагаліся ў краіне з COVID-19, але барацьба не скончыцца, пакуль ахоп вакцынацыяй у групах рызыкі не дойдзе да 90%, а ў грамадстве ў цэлым не перавысіць 75%. Гэта яшчэ дастаткова доўгі шлях», — сказаў ён.

Адзначаецца, што ў краіне будзе таксама ўзмоцнены кантроль за выкананнем мер бяспекі, будуць уведзеныя абмежаванні. У прыватнасці, у крамы, акрамя харчовых, стануць пускаць толькі з «зялёнымі» сертыфікатамі, якія пацвярджаюць, што чалавек зрабіў прышчэпку або нядаўна перахварэў. Большасці прадпрыемстваў і арганізацый будзе прапанавана перайсці на дыстанцыйную працу. Школы працягнуць працаваць, але вучні будуць абавязаны насіць маскі. Факультатыўныя заняткі абмяжуюць. Для мерапрыемстваў у памяшканнях будзе ўведзена абмежаванне на колькасць прысутных, таксама будзе павялічаная адлегласць паміж людзьмі. У памяшканні людзі абавязаны насіць маскі.