Мінздароўя РФ хоча лячыць нетрадыцыйную сексуальную арыентацыю ў кабінетах пры псіхдыспансерах
Адпаведны праект загаду размешчаны на федэральным партале праектаў нарматыўных актаў
Міністэрства аховы здароўя РФ падрыхтавала праект загаду, які ўносіць змены ў "Парадак аказання медыцынскай дапамогі пры псіхічных расстройствах і расстройствах паводзінаў", паведамляе www.gayrussia.eu. Прапануецца стварыць пры псіханеўралагічных дыспансерах сексалагічныя кабінеты, дзе будуць лячыць расстройствы палавой ідэнтыфікацыі, сексуальных перавагаў і расстройствы, звязаныя з палавым развіццём і арыентацыяй. Дакумент размешчаны на федэральным партале праектаў нарматыўных прававых актаў 19 лютага.
Праект устанаўлівае парадак арганізацыі дзейнасці сексалагічных кабінетаў, якія павінны быць створаны пры псіханеўралагічных дыспансерах, паліклініках, цэнтрах рэпрадуктыўнага здароўя.
"Сексалагічны кабінет прызначаны для аказання сексалагічнай дапамогі асобам, якія пакутуюць на сексуальныя дысфункцыі, не абумоўленыя арганічнымі парушэннямі або хваробамі, а таксама сексуальнымі дысфункцыямі змешанага генезу; на расстройствы палавой ідэнтыфікацыі; расстройствы сексуальных перавагаў; на псіхалагічныя і паводзінныя расстройствы, звязаныя з палавым развіццём і арыентацыяй; на сямейна-сексуальную дысгармонію", — гаворыцца ў праекце.
Як вынікае з тэксту праекта, асноўнымі функцыямі кабінета будуць дыягностыка, лячэнне і медыцынская рэабілітацыя асоб з названымі расстройствамі, удзел сумесна з лекарам-псіхіятрам у правядзенні прызначаных судом прымусовых мер медыцынскага характару ў адносінах да асобаў, якія пакутуюць на педафілію, вызначэнне паказанняў да змены пашпартнага полу, а таксама правядзенне экспертызы часовай непрацаздольнасці. Акрамя таго, супрацоўнікі кабінета павінны праводзіць санітарна-асветную, кансультатыўную і прафілактычную дзейнасць наконт пытанняў станаўлення сексуальнасці ў дзіцяча-падлеткавым узросце, палавога выхавання і асветы.
Цалкам з тэкстам загаду Міністэрства аховы здароўя РФ можна азнаёміцца па спасылцы ТУТ. Зараз ідуць грамадскія кансультацыі па прапанаванай ініцыятыве.