Польшча адкрыта да размяшчэння ядзернай зброі ЗША

У той жа час у Польшчы зазначаюць, што ініцыятыва павінна зыходзіць з Вашынгтона.

Віцэ-прэм'ер-міністр Польшчы Яраслаў Качыньскі заявіў, што Варшава адкрытая для размяшчэння ядзернай зброі ЗША на сваёй тэрыторыі. У той жа час палякі чакаюць ініцыятывы Вашынгтона на гэты конт.
Аб гэтым пішуць DW і Spiegel са спасылкай на інтэрв'ю палітыка нямецкай газеце Welt am Sonntag.
«Калі б амерыканцы папрасілі нас захоўваць ядзерную зброю ЗША ў Польшчы, мы былі б адкрыты для гэтага. Гэта значна ўмацавала б стрымліванне Масквы», — заявіў Качыньскі.
Пры гэтым польскі віцэ-прэм'ер удакладніў, што пакуль аб размяшчэнні амерыканскай ядзернай зброі ў Польшчы размова не ідзе, але «хутка гэта можа змяніцца». Качыньскі дадаў, што ініцыятыва павінна зыходзіць ад Вашынгтона.
Раней крамлёўскія прапагандысты неаднаразова выказвалі тэрытарыяльныя прэтэнзіі «на гістарычныя землі» краін Балтыі, Украіны і Польшчы. Некалькі разоў расейцы адкрыта пагражалі Польшчы ўварваннем пасля «захопу Украіны».
У адным з эфіраў на федэральным канале крамлёўскія «эксперты» нават паказвалі карту магчымага ўварвання ў краіны НАТА з адкрыццём калідора ў Калінінградскай вобласці.
Пасля польскі генерал, экс-камандуючы Сухапутнымі войскамі Вальдэмар Скшыпчак заявіў, што Польшча мае права прэтэндаваць на «акупаваную Расіяй» Калінінградскую вобласць.
У той жа час прэзідэнт Польшчы Анджэй Дуда адказаў лаянкавай прымаўкай на намёкі расійскіх уладаў аб тым, што вайна ва Украіне можа не абмежавацца толькі тэрыторыяй Украіны.