Расія. Святкаваць пераход Суворава

Дзяржсавет Татарстана адправіў у Дзярждуму РФ вета на праект святкавання Дня заканчэння Вялікага стаяння на рацэ Угры (1480 год).

Тая падзея лічыцца афіцыйнай датай заканчэння татара-мангольскага панавання на Русі.

Нагадаем, гэта ідэя ўзнікла ў кіраўніцтва Калужскай вобласці, лабісты дамагліся таго, што праект адпаведнай пастановы быў вынесены на разгляд Дзярждумы.

Зрэшты, у Казані прапануюць калужцам і іншым фанатам Угры кампенсацыю ў выглядзе свята з нагоды гадавіны пераходу Суворава праз Альпы (1799 год). На думку татарскіх чыноўнікаў, той паход «дэманструе бліскучую перамогу рускай зброі».

Прапанова здзівіла шмат каго, паколькі ў такім выпадку відавочна спатрэбяцца нейкія святочныя мерапрыемствы і ў Швейцарыі.

Аднак самае цікавае было яшчэ наперадзе. На думку гісторыкаў, у Суворава са Швейцарыяй выйшла хутчэй няўдача. Руская армія, што перайшла праз Альпы, апынулася ў даліне ў атачэнні французаў, адкуль давялося хутка сыходзіць.

Як бачым, падстаў для святкавання няшмат, а вось казаць пра неадукаванасць казанскіх чыноўнікаў можна смела.

Паводле расійскай прэсы