У Літве мітынг супраць каронавірусных абмежаванняў перарос у сутыкненні з паліцыяй (фота)

Раніцай 10 жніўня каля парламенту ў Вільні сабраўся мітынг пратэсту супраць намеру дэпутатаў увесці каранавірусныя абмежаванні для тых, не мае імунітэту або прышчэпкі ад каронавірусу, піша Свабода.

Днём каля парламенту сабраліся каля 4500 чалавек, акцыя праходзіла без інцыдэнтаў, паведаміў Delfi.lt. Яны выступалі супраць намеру ўраду ўвесці абмежаванні для непрышчэпленых (не плаціць ім «бальнічныя», калі яны захварэюць на COVID, дазваляць звальняць з працы, калі яны адмаўляюцца ад прышчэпкі). Гучалі патрабаванні адмяніць абавязковую вакцынацыю і тэставанне.

Мітынг быў дазволены да 17-й гадзіны, але людзі не разышліся. Яны не дазвалялі дэпутатам пакінуць будынак. Паліцыя сцягнула на месца пратэсту дадатковыя сілы, паведамілі літоўскія СМІ.

Па 23-й гадзіне паліцыя пачала выцясняць пратэстоўцаў. У адказ паляцелі камяні і бутэлькі. Паліцыя ўжыла слезацечны газ. Відавочцы чулі два выбухі, але прадстаўнік паліцыі заявіў, што яны не выкарыстоўвалі гранаты.

Пратэстоўцаў разагналі каля 2-й гадзіны ночы. 26 чалавек затрымалі.