У Санкт-Пецярбургу затрыманы ўкраінскі консул. МЗС Украіны: Гэта чарговая правакацыя

У Санкт-Пецярбургу 16 красавіка на некалькі гадзін затрымалі супрацоўніка генеральнага консульства Украіны. Міністэрства замежных спраў Украіны рыхтуе адказ на дзеянні расіян.

У Федэральнай службе бяспекі заявілі, што консул Аляксандр Сасанюк нібыта спрабаваў атрымаць закрытую інфармацыю, якая змяшчаецца ў базах даных праваахоўных органаў і ФСБ. Расія ў бліжэйшы час можа абвясціць Сасанюка персонай нон-грата.
Украінскія дыпламаты пацвердзілі факт затрымання консула ў Санкт-Пецярбургу Аляксандра Сасанюка.
Паводле звестак крыніцы УНІАН, украінскі консул правёў ноч у следчым упраўленні ФСБ у Санкт-Пецярбургу. Суразмоўца агенцтва таксама паведаміў, што следчыя дзеянні працягваюцца. Ён дадаў, што не можа пракаментаваць адэкватнасць вылучаных супраць Сасанюка абвінавачванняў.
Пры гэтым суразмоўца агенцтва адзначыў, што для забеспячэння правоў прадстаўніка ўкраінскай місіі на месцы знаходзіцца кіраўнік консульства і іншыя ўкраінскія дыпламаты.
Паводле яго слоў, згодна з дыпламатычнай практыкай у такіх сітуацыя, Расія ў бліжэйшы час можа абвясціць Сасанюка персонай нон-грата.

Рэакцыя ўкраінскага МЗС

Ва ўкраінскім МЗС выказалі абурэнне інцыдэнтам.
"Гэта чарговая правакацыя на фоне дэстабілізацыйных дзеянняў Расіі", — паведаміў BBC News Украіна прадстаўнік МЗС Алег Нікаленка.
Ён дадаў, што расійскія праваахоўнікі затрымалі супрацоўніка Генеральнага консульства толькі на некалькі гадзін.
"Цяпер ён знаходзіцца ва ўкраінскай дыпустанове. Абставіны затрымання высвятляюцца", — паведаміў Нікаленка.
У бліжэйшы час украінскі бок вызначыцца, як адрэагаваць на "паказаную правакацыю", дадаў спікер МЗС. Ён падкрэсліў, што адказ будзе "з улікам існуючай практыкі".