«Вочы жудасна пячэ». Галоўрэда расійскай «Новай газеты» Дзмітрыя Муратава аблілі фарбай у цягніку

Галоўрэда «Новай газеты», нобелеўскага лаўрэата Дзмітрыя Муратава аблілі чырвонай фарбай у цягніку, паведамляе выданне ў Тelegram.

«Аблілі ў купэ алейнай фарбай з ацэтонам. Вочы жудасна пячэ. Цягнік Масква — Самара», — заявіў Муратаў. Выданне апублікавала фота, на якім відаць, што галава і футболка журналіста запэцканыя чырвонай фарбай, яна таксама разліта па століку і паліцы купэ.

Нагадаем, летась Дзмітрый Муратаў быў узнагароджаны Нобелеўскай прэміяй міру.

«Новая газета» прыпыніла выхад неўзабаве пасля пачатку вайны ва Украіне. Прычына — фактычная немагчымасць працаваць праз татальную цэнзуру ў Расіі. Раней улады РФ дэ-факта прыпынілі працу іншых буйных незалежных медыя — радыёстанцыі «Эхо Москвы» і тэлеканала «Дождь».

Практыка падобных запалохванняў журналістаў існуе ў Расіі ўжо даўно. Так, некалі невядомыя аблілі фекаліямі вядомую журналістку Юлію Латыніну, пасля чаго тая з'ехала з Расіі. Таксама варта ўзгадаць, што некалі да паўсмерці быў збіты рэпарцёр Алег Кашын (таксама зараз у эміграцыі). А нядаўна — ужо пасля нападу Расіі на Украіну — невядомыя падкінулі галаву свінні пад дзверы былога галоўнага рэдактара «Эха Москвы» Аляксея Венядзіктава. Ва ўсіх згаданых (і ў многіх іншых) выпадках вінаватых так і не знайшлі.