З-за эскалацыі вакол Украіны 8500 амерыканскіх салдат гатовыя адправіцца ў Еўропу

У Пентагоне таксама дадалі, што пакуль не плануюць адклікаць сваіх дарадцаў з Украіны.

Прэс-сакратар Пентагона Джон Кірбі на брыфінгу заявіў, ЗША прывялі ў баявую гатоўнасць 8500 вайскоўцаў, для разгортвання ў Еўропе ў вельмі кароткія тэрміны, калі НАТА вырашыць прывесці ў гатоўнасць сілы хуткага рэагавання, піша «Голас Амерыкі».

Прадстаўнік Пентагона падкрэсліў, што рашэнне аб разгортванні войскаў яшчэ не прынятае, і што любое такое разгортванне будзе адбывацца асобна ад перасоўванняў войскаў ЗША ў Еўропе.

Акрамя гэтага, Джон Кірбі заявіў, што ЗША пакуль не плануюць адклікаць сваіх вайсковых дарадцаў і інструктараў, якія знаходзяцца ва Украіне.