Крыніцы: Індыя не падпісвае калійны кантракт, бо просіць Беларусь удакладніць маршруты паставак

Найбуйнейшы індыйскі імпарцёр калія Indian Potash папрасіў падсанкцыйнага беларускага пастаўшчыка ўдакладніць лагістыку перад падпісаннем новай здзелкі на гэты год. Аб гэтым піша Bloomberg са спасылкай на знаёмую з сітуацыяй крыніцу, якая папрасіла не называць яе імя, паколькі размова носіць прыватны характар.

«Беларуськалій» на запыт аб каментары не адказаў.

Indian Potash вядзе перамовы аб куплі 1 млн тон калію, паведаміў раней чалавек, знаёмы з гэтым пытаннем.

Раней Reuters пісаў, што Індыя плануе купляць беларускія калійныя ўгнаенні, нягледзячы на санкцыі ЕС і ЗША. Для разлікаў з беларускім бокам Індыя прапануе Беларускай калійнай кампаніі адкрыць рахунак у рупіях у Індыйскім дзяржбанку.

Нагадаем, ЗША ўвялі санкцыі супраць «Беларуськалія» і БКК. Санкцыі супраць «Беларуськалія» дзейнічаюць са снежня мінулага года, супраць БКК — уступаюць у сілу з красавіка.

З 1 лютага Літоўская чыгунка спыніла транзіт беларускага калію. На гэтым тыдні з'явілася інфармацыя, што Украіна прыпыняе транспарціроўку мінеральных угнаенняў з Беларусі па чыгунцы з 16 лютага. Аляксандр Лукашэнка заявіў, што Беларусь ужо праз год можа пачаць перавалку калійных угнаенняў на партовым тэрмінале ў Расіі, пабудаваным пры ўдзеле айчыннага капіталу. Учора ён заявіў, што ён з'явіцца пад Санкт-Пецярбургам, у сувязі з чым Уладзімір Пуцін аддаў адпаведныя распараджэнні.

За апошнія два гады Лукашэнку таксама прапаноўвалі выкарыстоўваць порт у Астраханскай вобласці. Сам жа ён заяўляў пра гатоўнасць экспартаваць угнаенні праз Мурманск.

Паводле reform.by.