Тых, хто працуе, усё менш: за ліпень рынак працы страціў яшчэ 1100 рабочых

Колькасць занятых у эканоміцы зноў знізілася. За ліпень эканоміка страціла яшчэ 1,1 тысяч чалавек, у выніку ў Беларусі цяпер занята 4147 тысяч чалавек, сведчаць абноўленыя даныя Нацыянальнага статыстычнага камітэта аб стане рынку працы. Усяго з пачатку года агульны спад колькасці занятых перавысіў 42 тысячы чалавек.

Праблема недахопу працоўных рук становіцца настолькі відавочнай, што пра гэта адкрыта кажуць нават чыноўнікі і дзяржаўныя СМІ. Немалаважны пры гэтым сам факт, што, нягледзячы на вастрыню гэтага пытання для эканомікі, даныя аб стане рынку працы ўсё яшчэ знаходзяцца ў публічным доступе.

Аднак, варта прызнаць, што, канстатуючы наяўнасць праблемы, у аналіз яе прычын ні чыноўнікі, ні дзяржаўныя сродкі масавай інфармацыі ўдавацца публічна не імкнуцца, адзначае тэлеграм-канал «Нашы грошы».

Беларусь па-ранейшаму валодае высокім чалавечым капіталам. Пра гэта кажуць не толькі міжнародныя рэйтынгі, але і канкурэнтаздольнасць беларускіх спецыялістаў. Нашы навукоўцы, бізнесмены, дзеячы культуры, мастацтва і айцішнікі толькі таму пацвярджэнне. Цяпер гэты капітал актыўна пакідае краіну або часцяком не можа знайсці сабе вольнага прымянення на радзіме.

У выніку вялікі патэнцыял аказваецца малапрадуктыўным у Беларусі і таму ўсё часцей становіцца драйверам росту для замежных краін.

Эканаміст: «Вельмі шмат матывацыі, каб з’ехаць, і вельмі мала — каб застацца»