Украінская разведка: Лукашэнка таемна дазволіў кантрабанду падсанкцыйных тавараў

Аляксандр Лукашэнка даў сакрэтнае ўказанне камандаванню Дзяржаўнага памежнага камітэта не перашкаджаць кантрабандзе на межах з Украінай, Польшчай і Літвой. Пра гэта паведамляе Галоўнае ўпраўленне разведкі Украіны.

Па звестках разведчыкаў, гэта звязана з рэзкім пагаршэннем фінансавай сітуацыі ў краіне з-за накладзеных на рэжым Лукашэнкі заходніх санкцый.

«Так беларускія ўлады спадзяюцца часткова паменшыць дэфіцыт паступленняў у бюджэт менавіта за кошт максімальнага стымулявання кантрабанды. У першую чаргу тытунёвых вырабаў мясцовых вытворцаў», — адзначылі ў ГУР.

У ведамстве патлумачылі, што такім чынам рэжыму атрымаецца часткова забяспечыць рынак Беларусі, а ў далейшым і РФ, санкцыйнымі групамі тавараў, якія раней дастаўляліся з краін ЕС.

«Спіс досыць шырокі: запчасткі да аўтамабільнай тэхнікі, гаспадарчыя тавары і г. д. Каб узмацніць паток тавараў, улады Беларусі саслабляюць патрабаванні да перасячэння мяжы з боку краін ЕС», — распавялі ў разведцы.

Памежныя ведамствы Польшчы і Літвы ўжо заяўляюць аб выяўленні буйных партый кантрабандных беларускіх тытунёвых вырабаў у грузавых аўтамабілях.