18-гадовую палітзняволеную Аніту Бакуновіч пачнуць судзіць праз тыдзень. На яе ціснуць у СІЗА

У судзе Савецкага раёна Мінска 30 чэрвеня будуць разглядаць справу Аніты Бакуновіч, якую абвінавачваюць ва ўдзеле ў дзеяннях, якія груба парушаюць грамадскі парадак (ч. 1 арт. 342 КК). Працэс будзе весці суддзя Сяргей Шаціла, паведамляюць праваабаронцы.

Палітзняволеную затрымалі чатыры месяцы таму. Зранку дзверы ў кватэру, дзе яна жыла з маці і братам, выламалі невядомыя. Яны не прадставіліся, правялі вобшук і забралі Аніту і яе брата Яна. Спачатку палітзняволеную асудзілі на 15 сутак, а ейны брат пасля допытаў у РУУС і ГУБАЗіК трапіў у лякарню ў перадінфарктным стане. Пазней у яго атрымалася сысці адтуль.

Яе знаходжанне ў турме ўсяляк намагаюцца пагоршыць, запісваючы відэа на допытах і падсяляючы «патрэбных» людзей у камеру.