Адвакат не змог трапіць да Сафіі Сапега, якую затрымалі разам з Пратасевічам

Адвакат затрыманай у аэрапорце Мінска грамадзянкі Расіі Сафіі Сапега пакуль не змог сустрэцца са сваёй падабароннай, якая знаходзіцца ў турме на Акрэсціна. Пра гэта паведаміў у аўторак ТАСС па тэлефоне бацька затрыманай Сяргей Дудзіч.

«У панядзелак мы заключылі дамову з адвакатам. Па стане на вечар учарашняга дня адвакат не трапіў да яе», — адзначыў бацька.

Грамадзянка Расіі Сафія Сапега, якую затрымалі 23 траўня разам з блогерам Раманам Пратасевічам, цяпер знаходзіцца ў ізалятары на Акрэсціна ў Мінску.

«Мы даведаліся з Інстаграма, што зрабіў пасадку рэйс, [які ляцеў] з Афін у Вільню. Яны былі на адпачынку. Звычайная паездка з маладым чалавекам. Мы жывём у Лідзе, мы даведаліся, што самалёт над Лідай развярнулі, да Вільні заставаліся лічаныя хвіліны ляцець».

Маці затрыманай Ганна Дудзіч дадала, што дачка паспела напісаць у WhatsApp толькі слова «мама».

«Яна не паспела працягнуць. Больш я з ёй не звязвалася. У цяперашні момант яна знаходзіцца ў ізалятары часовага ўтрымання на Акрэсціна, мы яе сёння знайшлі, нанялі адваката».

У чым абвінавачваюць 23-гадовую Сафію Сапега, дагэтуль невядома.

МЗС Расіі запытаў консульскі доступ да затрыманай.

«Мы сустрэліся з консулам, пагутарылі, апісалі сітуацыю, яны ў курсе таго, што адбылося, спадзяюся, яны нам дапамогуць», — сказала Ганна Дудзіч.

23 траўня, падчас вымушанай пасадкі ў Мінску рэйсу FR 4978 «Афіны — Вільня» авіякампаніі «Ryanair», спецслужбы рэжыму Лукашэнкі затрымалі блогера Рамана Пратасевіча і яго сяброўку, студэнтку Еўрапейскага гуманітарнага ўніверсітэта Сафію Сапега. Сапега — грамадзянка Расіі і вучыцца ў ЕГУ на праграме «Міжнароднае права і права Еўрапейскага Саюза».

Па вяртанні з адпачынку Сафію ў Вільні чакала абарона магістарскай працы.

Паводле «Свабоды».