Актывістцы, у якой засталося малое дзіця, замянілі арышт на штраф

Актывістка «Еўрапейскай Беларусі» Алена Лазарчык, якой прысудзілі 12 сутак арышту, пакінуўшы дома шасцігадовае дзіця, выйшла на свабоду.

Алена Лазарчыкраспавяла падрабязнасці свайго затрымання:
— Мяне арыштавалі па дарозе на працу. Завезлі ў РАУС Кастрычніцкага раёна, потым у судзе Кастрычніцкага раёна і судзілі. Довады аб тым, што ў мяне зусім малое дзіця, на суддзю не паўплывалі. Я не магу цяпер дакладна пазначыць прозвішча суддзі і супрацоўнікі РАУС, таму што я ўвесь час думала пра маленькага сына, мне было не да іх прозвішчаў.
Сёння мне ў ізалятары далі паперу, у якой указана, што не адседжаных мной 9 дзён замяняюцца на штраф сумаю 1215 рублёў. Таксама я вінная ізалятару за харчаванне, яны выставілі мне суму ў 40 рублёў за тыя тры дні, што я сядзела.
Фактычна тры дні я знаходзілася адна ў камеры, толькі адзін раз падсялілі дзяўчыну, але неўзабаве яе павезлі.
З сынам усё добра, ён знаходзіцца з бацькамі на лецішчы. Хацелася б падзякаваць усім за падтрымку і салідарнасць. Толькі дзякуючы гэтаму мяне вызвалілі.
Пасля арышту актывісткі першымі забілі трывогу праваабаронцы «Вясны». Нягледзячы на выходныя, юрыст Аляксей Лойка тэрмінова звярнуўся ў ГУУБ МУС з патрабаваннем неадкладна вызваліць Лазарчык Алену Мікалаеўну, якая другія суткі ўтрымлівалася ў ізалятары на Акрэсціна. Таксама праваабаронца тэлефанаваў наўпрост у цэнтральны апарат МУС па тэлефоне даверу.
spring96.org