«Будзе капец». Беларусы расказалі, што зьменіцца пасьля закрыцьця пераходу ў Баброўніках

Журналісты «Св*боды» пагаварылі зь беларусамі, якія пэрыядычна езьдзяць у Польшчу, пра тое, што для іх зьменіцца пасьля закрыцьця польска-беларускага пункту пропуску Баброўнікі — Бераставіца.

Час у дарозе павялічыцца мінімум на чатыры гадзіны

Польшча абвясьціла, што зь 10 лютага закрывае дарогу праз Баброўнікі. Цяпер будзе працаваць толькі адзін з шасьці пунктаў пропуску паміж Беларусьсю і Польшчай — празь Берасьце.

Самым зручным шляхам для гарадзенцаў у Беласток раней была дарога праз КПП Брузгі — Кузьніца. З Горадні да яго ехаць паўгадзіны. Аднак ужо больш за год ён не працуе, Польшча закрыла пераход з прычыны мігранцкага крызісу.

Тады гарадзенцы сталі езьдзіць у Польшчу праз КПП Бераставіца — Баброўнікі. Ён таксама знаходзіцца ў Горадзенскай вобласьці. Дарога да мяжы займала ўжо 1-1,5 гадзіны, аднак і гэты пункт быў вельмі запатрабаваным. Зараз яго закрыюць.

Цяпер беларусы змогуць паехаць у Польшчу або празь Берасьце, або праз два пункты пропуску на літоўскай мяжы. Шлях з Горадні да Берасьця займае тры гадзіны, з Тэрэспалю да Беластоку — яшчэ тры гадзіны. Значыць, агульны час дарогі Горадня — Беласток (паміж імі 80 км) павялічваецца на чатыры гадзіны, і гэта ня лічачы часу на самой мяжы. Паездка ў Польшчу празь Літву будзе яшчэ даўжэйшай.

Адказ на прысуд Пачобуту? Польшча закрывае пункт пропуску «Баброўнікі»

«А можа, Кузьніцу заўтра адкрыюць?»

«Пытаньне, закрыюць Баброўнікі ці не. Давайце пачакаем да заўтра і даведаемся дакладна. А можа, Кузьніцу заўтра адкрыюць? Пра тое, што на Баброўніках будуць рабіць рамонт, даўно гаварылі, але і на Кузьніцу зьбіраюцца дарогу падводзіць пад іншы маршрут», — гарадзенец Генрых* (імёны герояў зьмененыя дзеля бясьпекі суразмоўцаў) да апошняга ня хоча верыць, што зьнікне яшчэ адзін маршрут у Польшчу.

Ён яшчэ памятае тыя часы, калі езьдзіў у Польшчу праз Кузьніцу.

«Баброўнікі ніколі не былі для гарадзенцаў важнымі, пакуль не закрылі Кузьніцу. Цяпер гэта найбліжэйшае, праз што можна даехаць да Беластоку. Што будзе, калі і яго закрыюць, няясна», — кажа ён.

Генрых разважае, што тады давядзецца езьдзіць або празь Берасьце, або праз Літву.

«На літоўскім пераходзе будзе каляпс. Усё будзе залежаць ад працы літоўскай мытні і памежнікаў. Калі будуць пускаць так, як цяпер, то будзе капец поўны. Там недастаткова палос для транспарту», — мяркуе суразмоўца.

Ператрусы ў сябраў «Саюза палякаў»

«Раней заўсёды можна было паехаць дзень у дзень»

Мянчанка Анжаліка таксама пэрыядычна езьдзіць у Польшчу.

«Калі трэба было ў Беласток, то езьдзіць праз Баброўнікі было зручна. Заўсёды можна было зарэзэрваваць маршрутку і дзень у дзень паехаць, нягледзячы на тое, што, калі едзеш зь беларускага боку, трэба было стаяць у чарзе гадзін 8-10, што таксама вельмі вялікае выпрабаваньне», — прызнаецца яна.

Мянчанка і раней ужо часам выбірала маршрут празь Літву, бо яго псыхалягічна было лягчэй пераносіць.

«Хоць дарога ў гадзінах атрымліваецца даўжэйшай, літоўскую мяжу было праходзіць лягчэй, менш часу стаіш непасрэдна на мяжы — 2-3 гадзіны. Калі ты едзеш, карцінка за вакном зьмяняецца, гэта пераносіцца лепш, чым калі ты дзесяць гадзін стаіш і чакаеш, пакуль маршрутка пасунецца на 10 мэтраў бліжэй да шлягбаўма», — разважае яна.

Калі цяпер асноўны паток беларусаў накіруецца на Вільню, то і там давядзецца стаяць на мяжы па дзесяць гадзін, думае яна.

Анжаліка мяркуе, што зараз яна сама і іншыя беларусы будуць езьдзіць у Польшчу радзей, бо дарога стане яшчэ цяжэйшай і даўжэйшай.

«Вельмі шкада, што прынялі такое рашэньне. Марнаваць суткі на дарогу непрыемна», — падсумоўвае яна.