Доктар Мартаў — пра ковiд: «Чуму ў чумным бараку не перамагаюць»

Доктар-рэаніматолаг Уладзімір Мартаў, былы загадчык аддзялення анэстэзіялогіі і рэанімацыі Віцебскай бальніцы хуткай дапамогі, распавёў «Свабодзе» пра чацвёртую хвалю пандэміі.

— Набраўся ж досвед у лячэнні каронавіруснай інфекцыі. Ці гэта выключна пытанне арганізацыі?

— Мне таксама незразумела. Калі ўважліва слухаць беларускія навіны пра каронавірус, то абмяркоўваецца шпіталізацыя ў лякарні, месцы ў рэанімацыях, абмяркоўваюцца кіслародныя пункты, колькасць балонаў, апаратаў ШВЛ. Абмяркоўваюцца рэчы, якія да перамогі над пандэміяй маюць аддаленае дачыненне, бо чуму ў чумным бараку не перамагаюць.

У чумны барак трапляюць з цяжкімі выпадкамі. Рэанімацыя — верхавіна айсбергу. Перамога адбываецца па-за рэанімацыяй. У рэанімацыі ніякіх перамогаў няма, там ідзе змаганне за кожнага чалавека.

Мне проста незразумела, чаму няма таго, што называецца арганізацыйныя і проціэпідэмічныя мерапрыемствы, якія павінны перамагчы каронавірус. Я разумею, чаму гэтага не было ў першую хвалю. Палітыка, не палітыка, ілюзіі, уяўленне, што само пройдзе. Але цяпер не ведаю, у каго засталіся ілюзіі, што гэта само пройдзе.

— Ці зрабілі вы прышчэпку ад каронавірусу?

— Так, я вакцынаваўся кітайскай вакцынай. Гэта было свядомае рашэнне, як мне падаецца, аптымальнае ў нашых умовах. Я не адразу вакцынаваўся, бо год таму перахварэў, хаця і ў лёгкай форме. Пакуль я працаваў у «чумным бараку», у мяне было адчуванне, што сталы кантакт, падхопліванне малых дозаў — свайго роду вакцынацыя, бо вакол хварэюць.

Цяпер я не працую і мала кантактую з людзьмі, і нехта з маіх сяброў, якія працуюць, можа мне гэта «прывезці». Было зразумела, што трэба абараняцца, і вакцынацыя — адзін з надзейных спосабаў пазбегнуць цяжкага цячэння хваробы.

— Што вы параіце людзям рабіць ці не рабіць, каб захаваць здароўе і жыццё сваё і сваіх блізкіх падчас новай хвалі каронавіруснай эпідэміі?

— Я заклікаю ўсіх думаць над тым, што вы робіце з пункту гледжання пандэміі. Як аказалася, думаць пра вас, за вас і вашых блізкіх ніхто больш не будзе. Пандэмія — гэта не прыдумка. Дагэтуль сустракаю меркаванні, што гэта ўсё прыдумана і гэта ўсё для чыпавання.

Гэта варʼяцтва, асабліва з пункту гледжання таго, што ўжо чацвёртая хваля. Думайце самі. Маскі, дыстанцыяванне, вакцынацыя — гэта ваша рашэнне. Усё ў вашых руках.

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: