Дзмітрый Падлобнікаў са Жлобіна. Яшчэ адзін беларус чакае экстрадыцыі з Расіі за ўдзел у пратэстах

25-гадовы Дзмітрый Падлобнікаў выходзіў на акцыі пратэсту супраць фальсіфікацыі выбараў у Жлобіне, распавядае «Свабода».

Дзмітрыя Падлобнікава затрымалі 9 жніўня 2020 года, пратрымалі тры дні ў Петрыкаўскім РАУС і адпусцілі на волю. Пазней ён выехаў на працу ў Расію, аднак у траўні 2021 года быў затрыманы там паводле запыту рэжыму Лукашэнкі. Дзмітрый чакаў пастановы на экстрадыцыю ў СІЗА горада Каломна, нядаўна яго перавезлі ў адзін з маскоўскіх СІЗА.

Ад жніўня 2020 года ў Расіі арыштавалі сама меней два дзясяткі беларусаў у справах, звязаных з пратэстамі супраць рэжыму Лукашэнкі. Некаторых ужо выслалі на радзіму, іншых чакае экстрадыцыя ці дэпартацыя.

Масква рэдка адмаўляе Мінску і дапускае да затрыманняў на сваёй тэрыторыі беларускіх сілавікоў. Журналісты выявілі экстрадыцыйныя справы, пра якія не ведаюць нават праваабаронцы.