Гомельская прапагандыстка пляжыць на ТБ Літву і Польшчу, а потым з захапленнем там адпачывае

Грамадства

Святлана Князева — работніца гомельскага тэлебачання з 15 гадовым стажам. Апошнія гады яе можна ўбачыць у якасці вядоўцы праграм на рэгіянальным «Беларусь 4 Гомель», сёння яна з'яўляецца редактарам аддзелу падрыхтоўкі тэлевізійных праграм ТРК «Гомель», піша «Фл*гшток».

image62eb946ccde92lg.jpeg

У навінных выпусках і сваіх аўтарскіх матэрыялах яна расказвае пра важнасць «рэферэндума», «генацыд беларускага народа», поспехі ў сельскай гаспадарцы, інтэграцыю з Расіяй, «варожыя» еўрапейскія краіны», а таксама пра тое, як эканоміка рэгіёна спраўляецца з заходнімі санкцыямі.

Але, мяркуючы па фотаздымках, якія яна размясціла на сваёй старонцы ў Інстаграм, адпачываць «для перазагрузкі» Князева ездзіць у еўрапейскія краіны «па прыгожых гарадах з багатай гісторыяй».

У апошнія месяцы яна апублікавала справаздачу з краінаў, якія якраз і дэманізуе беларуская прапаганда, — з Польшчы і Літвы. Яна захапляецца старой архітэктурай, добраўпарадкаваннем. На адным з фотаздымкаў з Варшавы яна напісала: «Лёгкасць, свабода, творчасць — на кожным кроку».

image62eb948ccfddelg.jpeg

З апошніх прапагандысцкіх рэпартажаў Святланы Князевай варта адзначыць сюжэт пра свята для ўкраінскіх дзяцей-мігрантаў, якое ў выніку павярнулася затрыманнем яго ініцыятараў. Відэашэраг з затрыманай актывісткай Алай Караленка прапагандыстка суправадзіла такімі словамі: «Нічога святога. Актывісты навязваюць нацызм, уцягваючы сваіх уласных дзяцей у экстрэмісцкую прапаганду. Фота і відэа з акцыі потым шырока разышліся па сетках пад лозунгамі, якія неабходныя заходнім куратарам».

Верагодна, цяперашняя паездка ў Еўропу — адна з апошніх магчымасцяў для прапагандысткі. Напрыклад, Міністэрства ўнутраных спраў Латвіі ўжо падрыхтавала папраўкі ў правілы аб дзяржавах, грамадзяне якіх пры падачы дакументаў на візу і від на жыхарства павінны праходзіць праверкі на прадмет пагрозы нацыянальнай бяспекі і грамадскаму парадку. Ужо сёння ва ўездзе ў краіну адмаўляюць тым, хто адкрыта дэманструе падтрымку вайсковай агрэсіі РФ супраць Украіны.