Якая краіна выдала шэнгенскую візу футбольнаму кіраўніку Базанаву? Гэта ўжо вядома

Гэта праз крыніцы ў паліцыі даведалася аўтарытэтнае чэскае выданне Deník N.

Старшыня беларускага футболу Уладзімір Базанаў, якога на мінулым тыдні паліцыя выслала з Чэхіі, атрымаў візу ў шэнгенскую зону з Венгрыі, сцвярджае Deník N.

«Сёння ў Беларусі прасцей за ўсё атрымаць шэнгенскую візу праз гэтую краіну, выкарыстоўваючы высокія палітычныя кантакты», — кажа аналітык Асацыяцыі міжнародных справаў Павел Гаўлічак.

Замежная паліцыя затрымала футбольнага чыноўніка ў аўторак — ён суправаджаў жаночую футбольную зборную ў Чэхію. Праз дзень яму анулявалі візу і прадпісалі пакінуць краіну.

Дагэтуль было невядома, якім чынам Базанаў, які знаходзіцца ў санкцыйных спісах, атрымаў візу, бо чэскае Міністэрства замежных спраў яму візы не выдавала. Deník N даведалася з трох крыніц у МЗС і і паліцыі, што стандартную трохмесячную візу яму выдала Венгрыя.

Венгерская амбасада ў Чэхіі ад камэнтароў адмовілася і накіравала журналістаў з пытаньнямі ў МЗС.

Міжнародны аналітык Гаўлічак кажа, што зусім не здзіўлены, што Базанаву даў візу Будапешт. Ён звяртае ўвагу, што на працягу апошніх дзесяці гадоў Венгрыя была найбуйнейшым еўрапейскім хаўруснікам Расіі ці Кітаю і іх прыхільнікаў, у тым ліку Беларусі.

«У той час, калі адносіны паміж Польшчай і Літвой з Беларуссю былі ўжо зусім катастрафічнымі, мы былі сведкамі сустрэчы Орбана з Лукашэнкам у духу добрага эканамічнага супрацоўніцтва», — згадвае Гаўлічак. 

Паводле яго, прыязны падыход Будапешта да некаторых праблемных краін быў відавочны з моманту прыходу да ўлады Віктара Орбана ў пачатку мінулага дзесяцігоддзя. Асноўны матыў — дзелавыя адносіны і эканамічная аргументацыя, якую цяперашні венгерскі прэм'ер ставіць вышэй за ўсё.

Паводле svaboda.org.