Кантрабанда і фінансаванне пратэстаў. Палітвязням праваабаронцам «В*сны» прад'явілі новыя абвінавачанні

Кіраўнік праваабарончага цэнтру «В*сна» Алесь Бяляцкі, ягоны намеснік Валянцін Стэфановіч і каардынатар кампаніі «Праваабаронцы за свабодныя выбары» Уладзімір Лабковіч больш за год знаходзіліся за кратамі па крымінальнай справе за нявыплату падаткаў. Але зараз ім прад'явілі новыя абвінавачанні.
Расследаванне крымінальнай справы, заведзенай за нявыплату падаткаў, спыненае. Аднак праваабаронцы не выйшлі на волю. Цяпер іх абвінавачваюць у кантрабандзе буйной сумы грошай арганізаванай групай па ч. 4 арт. 228 КК і фінансаванні групавых дзеянняў, якія груба парушаюць грамадскі парадак па ч. 2 арт. 342 КК.

Нягледзячы на ​​перагляд абвінавачання, прэтэнзіі дзяржавы застаюцца на тую ж суму грошай, што фігуравала ў справе аб нявыплаце падаткаў. Санкцыя самага суровага артыкула абвінавачання прадугледжвае да 12 гадоў пазбаўлення волі.

Юрыст праваабаронцаў Павел Сапелка пракаментаваў новыя абвінавачанні калегам.

— Рэжым падвышае стаўкі, высоўваючы адно за іншым абвінавачванні, — адно недарэчнейшае за іншае. Спачатку нашых калегаў пратрымалі ў турме больш за год па абвінавачанні, ад якога нават зараз, падчас найглыбокага прававога крызісу, ім прыйшлося адмовіцца. Але на свет з'явілася новае — больш недарэчнае і болей жорсткае абвінавачванне, якім кваліфікавалі парушэнні пры перамяшчэнні праз мяжу грошай на дапамогу ахвярам палітычных рэпрэсій і на падтрымку дзейнасці ПЦ «Вясна», — заяўляе Сапелка. — Пакідаючы за дужкамі пытанне аб тым, як і наколькі гэта ўсё адпавядае фактам і пацвярджаецца прымальнымі доказамі, хочацца атрымаць ад уладаў адказ на даўняе пытанне: якім чынам магла выконваць якія б там ні было фармальнасці арганізацыя, адвольна (па высновах Камітэта па правах чалавека ААН) пазбаўленая рэгістрацыі?

Нагадаем, учора Алесю Бяляцкаму споўнілася 60.

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,
Больш цікавага на «Новым Часе»: