Мінздароўя абвясціла пра менш чым 800 выпадкаў COVID-19 за суткі

Міністэрства аховы здароўя Беларусі абнавіла каронавірусную статыстыку. У краіне за суткі зарэгістравана ўсяго 778 новых выпадкаў COVID-19. Апошні раз такі нізкі паказчык ведамства называла ў жніўні.

Усяго ж з пачатку пандэміі ўжо пацверджана 676 512 дыягназаў.

Выпісаныя за дзень 792 чалавекі. Ачунялым лічыцца 667 041 пацыент за ўвесь час, піша REFORM.by.

За суткі памерлі 16 чалавек з каронавіруснай інфекцыяй. Усяго ў афіцыйнай статыстыцы ўжо 5305 смяротных выпадкаў.

Ужо неаднаразова было заўважана, што колькасць афіцыйна захварэлых COVID-19 ад Міністэрства аховы здароўя практычна наўпрост карэлюецца з колькасцю праведзеных тэстаў. Чым менш праведзена тэстаў — тым менш афіцыйна хворых. За мінулыя суткі ў краіне было праведзена ўсяго 5884 тэсты. У цэлым з пачатку пандэміі ў краіне праведзена амаль 10,7 млн тэстаў.