Па дадзеных праваабаронцаў, за нядзельныя маршы ў Мінску затрыманыя толькі 6 чалавек
Пра трох затрыманых паведамляе тэлеграм-канал «Спісы затрыманых». Яшчэ пра трох — праваабарончы цэнтр «Вясна».
Паводле ТГ-канала «Спісы затрыманых» сёння былі схопленыя Анастасія Калашнікава, Таццяна Пуцеева і Кацярына Тарэлкіна. Вядома, што Анастасія Калашнікава — фельчар выязной брыгады, шматразовая чэмпіёнка і прызёрка чэмпіянату Беларусі па тайскім боксе і кікбоксінгу, прызёрка міжнародных турніраў.
Анастасія Калашнікава, фота t.me/bel_girls
«Вясна» паведамляе, што затрыманы Павел Гірыс, а ўвечары на Пушкінскай плошчы былі затрыманыя Кацярына Карыцько і Паліна Лойка.
Нагадаем, 17 студзеня, нягледзячы на маразы, прайшлі шматлікія вулічныя акцыі ў розных мястэчках і гарадах Беларусі, раёнах Мінска, а таксама за межамі краіны.