Памежная служба Польшчы: Каля 10 000 мігрантаў у Беларусі плануюць нелегальна перасячы мяжу

«Паводле нашых даных, у Беларусі каля 10 тысяч замежнікаў, якія плануюць перайсці мяжу нелегальна», — паведаміла прэс-сакратарка Польскай памежнай службы Ганна Міхальска.

Прэс-сакратарку спыталі пра лагеры мігрантаў на мяжы з Польшчай, паведамляе «Свабода».

— Ніякіх стаянак на мяжы мы не назіраем. Цяпер у ваколіцах Кузніцы ціха, няма спроб перасячы мяжу з ужываннем сілы, — падкрэсліла Міхальска. — На мяжы людзі цяпер не разбіваюць лагеры, іх прывозіць грузавікамі беларускі бок.

«Магчыма, з гэтага цэнтра, магчыма, з іншых месцаў, дзе яны збіраюцца», — сказала яна.

Прадстаўніца Памежнай службы адзначыла, што, паводле іх звестак, у Беларусі цяпер каля 10 тысяч замежнікаў, якія плануюць нелегальна перасячы мяжу.

— Колькі іх каля мяжы, а колькі ў глыбіні краіны, мы не ведаем, — сказала Міхальска.

На пытанне, ці змяніліся працэдуры адносна выезду грузавікоў з Беларусі, Міхальска адказала, што «ў правілах нічога не змянілася».

— Сапраўды, грузавікоў даволі шмат. Калі ласка, памятайце, што на гэта таксама паўплывала тое, што пераход у Кузніцы зачынены, — нагадала яна.

Ці разглядаецца варыянт адкрыцця пераходу ў Кузніцы?

— Пакуль у мяне няма інфармацыі, што пераход будзе адкрыты ў бліжэйшыя дні, — адказала Міхальска.