Памятаеце ІТ-шніка з БЧБ-сцягам на балконе, у якога забралі машыну? Стала вядома, што з аўто цяпер
2 сакавіка ў жылым квартале «Пірс» эвакуявалі машыну гаспадара кватэры, які не здымаў са свайго балкона бел-чырвона-белы сцяг. Тады мужчыну асудзілі на 15 сутак за пікетаванне, а прычыну эвакуацыі аўто не патлумачылі. TUT.BY высветліў, чаму ў ўладальніка забіралі машыну і што з ёй зараз.
Нагадаем, падзеі вакол балкона са сцягам у «Пірсе» пачаліся 2 сакавіка. Да дома пад'ехалі сілавікі, каб зняць сцяг з балкона Іллі Квачэнкі, а калі не змаглі гэта зрабіць — да дома прыбыў эвакуатар і забраў машыну жыхара з яго паркавальнага месца.
На наступны дзень супрацьстаянне працягнулася. Раніцай у
тамбуры кватэры, дзе жыве мужчына, адключылі святло, у дзверы да Іллі стукалі і
прасілі выйсці і праехаць у аддзяленне. Пазней да дома прыехала аўтавышка, а
мужчына зняў сцяг. Яму пакінулі позву з патрабаваннем з'явіцца ў РАУС. Ён
прыйшоў туды 4 сакавіка і быў затрыманы. Пасля мужчыну асудзілі на 15 сутак за
пікетаванне сцягам на балконе без узгаднення з Мінгарвыканкамам. Што з машынай,
тады ніхто не патлумачыў.
Ілля Квачэнка карыстаецца BMW па даверанасці, афіцыйна яе
гаспадаром з'яўляецца яго сваяк. Машыну Іллі вярнулі пару тыдняў таму, паўтара
месяца яна была на паркоўцы аддзялення міліцыі. Па яго словах, ніякіх
падазроных змяненняў ён не заўважыў, машына была апячатаная.
Высветлілася, што аўтамабіль у Іллі эвакуявалі з падазрэннем
на перайначванне VIN-нумара, які знаходзіцца пад капотам машыны. За гэта маглі
ўзбудзіць крымінальную справу па ч. 1 арт. 380 ч. 1 арт. 381 КК РБ. Але пасля
эвакуацыі машыны і экспертызы ў Мінскім міжраённым аддзеле Дзяржаўнага камітэта
судовых экспертыз пацвердзілі, што змены нумара не было, у парадку і дакументы
на машыну.
У пастанове аб адмове ва ўзбуджэнні крымінальнай справы ўказана прычына эвакуацыі — нібыта 2 сакавіка ў
РУУС «паступіла інфармацыя», што на аўтастаянцы ЖК «Пірс»
прыпаркаваны аўтамабіль Іллі, «у якім магчыма перайначванне нумара кузава».
«Вышэйзгаданы аўтамабіль 02.03.2021 пратаколам агляду
месца здарэння на паркавальным месцы № 11 паблізу дома па вуліцы Сонечны пляж у
аг. Ратамка Мінскага раёна быў канфіскаваны». Такія абставіны эвакуацыі
аўто паказваюць супрацоўнікі Мінскага РУУС.
— Вядома, ніхто не звязвае гэта непасрэдна са сцягам. Але
гэта здарылася менавіта ў той дзень, і самае цікавае, што звонку машыны не
відаць VIN-нумары, атрымліваецца, супрацоўнік міліцыі рэнтгенаўскім зрокам
зірнуў пад капот, і ў яго ўзнікла падазрэнне на змяненне нумара, — кажа Ілля.
Зараз аўтамабіль выстаўлены на продаж, Ілля кажа, што з
эвакуацыяй аўто гэта не звязана, планы прадаць BMW у яго былі і раней.