Польскія чыноўнікі наведалі Гродна

Развіццё трансгранічнага супрацоўніцтва, азнаямленне з эканамічным патэнцыялам рэгіёна і падтрымка прысутнасці польскіх прадпрыемстваў у Гродзенскай вобласці сталі мэтай візіту намесніка міністра замежных спраў Польшчы Катажыны Кацперчык і намесніка міністра эканомікі Польшчы Анджэя Дыхі ў Гродна.  



Падчас сустрэчы з губернатарам Гродзенскай вобласці Уладзімірам Краўцовым прадстаўнікі польскай дэлегацыі абмеркавалі шансы і перспектывы развіцця эканамічнага супрацоўніцтва. Сёння Польшча з’яўляецца другім па велічыні гандлёвым партнёрам Гродзенскай вобласці.

Падчас сустрэчы ў СЭЗ “Гроднаінвест” польская дэлегацыя, з удзелам прадстаўнікоў Міністэрства навакольнага асяроддзя і прадпрыемстваў, аб’яднаных праграмай “GreenEvo”, мела магчымасць пазнаёміцца з умовамі інвеставання ў Гродзенскай вобласці.

На сённяшні дзень у СЭЗ зарэгістравана 95 рэзідэнтаў з 23 краін, у тым ліку 14 з Польшчы, якія рэалізуюць праекты ў галіне лёгкай, харчовай прамысловасці, дрэваапрацоўкі, будаўніцтва і інш.

Намеснікі міністраў наведалі сядзібу кампаніі з польскім капіталам OOO “Тайфун”, якая ўваходзіць у склад групы “Атлас”. Дэлегацыя наведала вытворчы цэх, лабараторыю і склад.

Намеснік міністра К. Кацперчык сустрэлася таксама з супрацоўнікамі Генеральнага консульства Рэспублікі Польшча ў г. Гродна і наведала найбольш значныя мясціны Гродна, у тым ліку Новы замак.

Па інфармацыі Пасольства Рэспублікі Польшча ў Рэспубліцы Беларусь