Суд над вядомым гомельскім вандроўнікам будзе закрытым

Суд над гомельскім краязнаўцам і вандроўнікам, палітвязнем Ігарам Галушкам пройдзе ў закрытым рэжыме. У суд не патрапяць ні сваякі, ні сябры абвінавачанага.

У Гомельскім абласным судзе 30 чэрвеня пачынаецца разгляд крымінальнай справы краязнаўцы і вандроўніка Ігара Галушкі. Палітзняволенага абвінавачваюць у распальванні сацыяльнай варожасці альбо варажнечы (ч. 1. арт. 130 Крымінальнага кодэкса) і абразе прэзідэнта Беларусі (ч. 1 арт. 368 Крымінальнага кодэкса). Справа была распачатая за каментарыі на палітычную тэму ў перыяд 2020–2021 гадоў.

Справу будзе разглядаць суддзя Аляксей Хлышчанкоў.

Ігар Віктаравіч Галушка — вядомы ў Гомелі грамадскі дзеяч, турыст са стажам у 40 гадоў і арганізатар пешых паходаў. Галушку затрымалі 1 сакавіка 2022 года і да суда ўтрымлівалі ў СІЗА № 3 г. Гомеля.

Як стала вядома праваабаронцам, у раскладзе судовых пасяджэнняў Гомельскага абласнога суда па стане на 30 чэрвеня пазначана, што працэс над Ігарам Галушкам пройдзе ў закрытым рэжыме. Гэта азначае, што ў суд не патрапяць ні сваякі, ні сябры абвінавачанага.