Што з «Вялікай размовай» Лукашэнкі? Выглядае, яе адмянілі ці адклалі

Прэс-служба Лукашэнкі анансавала чарговую «Вялікую размову» з ім, але яна раптам знікла з раскладу афіцыйных мерапрыемстваў. Што здарылася, дакладна невядома, бо, як і заўсёды, афіцыйных паведамленняў няма.

Як распавядае «Н*ша Ніва», пасля візіту Аляксандра Лукашэнкі і чыноўнікаў у Зімбабвэ Наталля Эйсмант анансавала гэтак званую «Вялікую размову» — фірмовае зрэжысіраванае тэлешоу, стылізаванае пад прэс-канферэнцыю. Меркавалася, што яна пройдзе 14 лютага. Але нешта пайшло не так.

«У лютым у нас запланавана «Вялікая размова». Яна, як звычайна, пройдзе ў шырокім складзе. Мы запрашаем нашых журналістаў, блогераў, грамадскіх дзеячаў да максімальна шчырай размовы ў жывым эфіры. […] Нам вельмі важна было пасля няпростага, але някепскага 2022 года даць магчымасць журналістам разам з [Лукашэнкам] падвесці яго вынікі […] [Лукашэнка] будзе максімальна адкрыты і адкажа на ўсе пытанні журналістаў», — цытавала БелТА Наталлю Эйсмант на пачатку лютага.

Сродкі масавай прапаганды распачалі падрыхтоўку да асвятлення мерапрыемства, а па ўсёй краіне пачалі праводзіць адбор «ябацек» для камандзіроўкі ў сталіцу.

Але потым падрыхтоўку прыпынілі.

«Трапіць на гэтую размову прэстыжна па каштоўнасных арыенцірах сістэмы. Ад нашага выканкама меўся ехаць заўважны «ябацька». Але «размову» адмянілі. Чаму — не ведаю», — сказаў выданню чыноўнік аднаго з аблвыканкамаў.

Тую ж інфармацыю пацвердзіў супрацоўнік аднаго са СМІ.

«Сапраўды, адмянілі. Чаму, не ведаю. У нас у працоўным графіку на люты было, а потым не стала. На ўзроўні размоў тлумачаць, што ў Лукашэнкі змяніўся графік. Афіцыйнага тлумачэння не ведаю», — сказаў гэты чалавек.

Згарэў хлеў — гары і хата!

Эйсмант пакуль ніяк не паведамляла пра адмену лукашэнкаўскага стэндапу.

Папярэдні раз «Вялікая размова» адбылася 9 жніўня 2021 года. На тую размову незалежныя СМІ ўжо не запрашалі, але прысутнічалі замежныя журналісты, і ўвесь сцэнар быў пабудаваны на «адлупе» як з боку Аляксандра Лукашэнкі, так і з боку прапагандыстаў, сярод якіх былі, у прыватнасці, Рыгор Азаронак і Ксенія Лебедзева. Тая прэс-канферэнцыя доўжылася 8 гадзін, што мела на мэце паказаць фізічную і інтэлектуальную форму Лукашэнкі праз год пасля паражэння 2020 года.

Сёння расійскія СМІ паведамілі, што 17 лютага можа адбыцца чарговая сустрэча Аляксандра Лукашэнкі і Уладзіміра Пуціна. Магчыма, значэнне анансаваных перамоў двух саюзнікаў настолькі вялікае ў кантэксце вайны ва Украіне, эканомікі і іншых важных чыннікаў, што «Вялікую размову» вырашылі адтэрмінаваць да атрымання вынікаў. Але, зноў жа, аніякіх тлумачэнняў афіцыйныя крыніцы не даюць.