У Мазыры затрымалі жонку лідара гурта «Ня варта» і яшчэ дзясятак чалавек

ГУБАЗіК паведаміў пра затрыманне больш за дзесяць мазырчукоў, якіх называе «радыкальнымі анархістамі». Па інфармацыі сілавікоў, супраць дваіх з іх распачалі крымінальныя справы аб распальванні варожасці (артыкул 130 КК) і садзейнічанне экстрэмісцкай дзейнасці (артыкул 361-4 КК), паведамляюць праваабаронцы.

Таксама паведамляецца, што падчас ператрусаў у затрыманых канфіскавалі «пратэсную сімволіку» і «іншыя забароненыя да грамадзянскага абароту прадметы і рэчывы».

На «пакаяльных відэа» журналісты пазналі жонку вакаліста гурта «Ня варта» Фёдара Чаранкова Крысціну. Яна распавядае, што са снежня 2020 года публікавала ў Instagram пасты «з негатыўнай ацэнкай працы супрацоўнікаў [міліцыі], і з абразамі на іх адрас». Пры гэтым, падкрэслівае яна, нікога пайменна яна не называла.

Другая затрыманая распавядае, што была падпісаная на «экстрэмісцкія тэлеграм-каналы». Яна таксама кажа, што здымала на мабільны тэлефон перамяшчэнне ваеннай тэхнікі і дасылала гэтыя відэа ў чат-бот аднаго з тэлеграм-каналаў.

Яшчэ некалькі затрыманых таксама кажуць пра падпіскі на «экстрэмісцкія каналы» і ўдзел у пратэстах 2020 года.