У Мінску з акна пятага паверха выпаў мужчына, у яго кватэры знойдзена цела 33-гадовай жанчыны. Дапоўнена

Здарэнне адбылося сёння каля 18:30 у доме на праспекце Ракасоўскага, паведамілі ў МУС.

Мужчына застаўся жывы, яго даставілі ў бальніцу. Папярэдне ўстаноўлена, што пацярпелы — 36-гадовы мінчанін.
Паводле непацверджанай інфармацыі, мужчына ў ваеннай форме стрэліў у жанчыну ў адной з кватэр па пр. Ракасоўскага, пасля чаго выскачыў з акна. Па факце забойства жанчыны і падзення мужчыны з акна праводзіцца праверка.
На месцы працуе следча-аператыўная група, высвятляюцца абставіны здарэння.
Дапоўнена. Арыенціроўка па пошуку падазраванага ў забойстве на Ракасоўскага: «Апрануты ў камуфляжную форму альбо ў форму супрацоўніка міліцыі. Асаблівыя прыкметы: на руках маюцца парэзы. На твары медыцынская маска».
З акна выскачыў не нападнік, а яшчэ адзін пацярпелы. Пасля падзення аператыўна прыехала «хуткая» і забрала яго.
Нападнік уцёк, у Мінску ўведзены план «Сірэна».