У Гродне парад Дзядоў Марозаў прайшоў з казой і лімузінам (фота, відэа)
Галоўныя казачныя героі ехалі на джыпе, а перад імі на лімузіне — каза з капустай.
Штогадовы парад Дзядоў Марозаў прайшоў у Гродне 20 снежня. Святочны рытуал ўключэння навагодняй ілюмінацыі пачалі на Савецкай плошчы. Да пачатку шэсця тут сабралася вялікая колькасць гродзенцаў са сваімі дзецьмі. Ужо ў цемры агні на ёлцы запаліліся першымі ў горадзе.
Далей па цэнтральнай вуліцы каля 300 Дзядоў Марозаў і Снягурак ў суправаджэнні аркестра і натоўпу гараджан накіраваліся да асноўнага месца свята — на плошчу Леніна.
Ачолілі калону галоўныя персанажы на джыпе, за якімі ехаў сімвал 2015 года — каза на лімузіне. А ўсіх астатніх казачных удзельнікаў параду ўзначальваў Дзед Мароз на сігвее. Пасля таго, як елка зазіхацела і тут, на плошчы пачалося прадстаўленне, дзе розныя казачныя героі забаўлялі гараджан гульнямі і танцамі.
