«Усім дзякуй!» Вызвалены менеджар PandaDoc Віктар Куўшынаў апублікаваў першае фота

Дырэктар па прадукце стартапа PandaDoc Віктар Куўшынаў днём 21 жніўня апублікаваў першае фота пасля вызвалення з СІЗА. «Усім дзякуй за падтрымку! / Thanks everyone for the support!», — напісаў Куўшынаў у сваім акаўнце ў Facebook.

За кратамі топ-менеджар PandaDoc правёў 11 месяцаў і 19 дзён. Ён быў апошнім з чацвярых затрыманых супрацоўнікаў кампаніі, які заставаўся ў СІЗА. Куўшынаву інкрымінавалі махлярства, здзейсненае арганізаванай групай ці ў асабліва буйным памеры.

У жніўні 2020 года Віктар Куўшынаў дапамагаў педагогам, якія ўваходзілі ў выбарчыя камісіі і заявілі аб парушэннях на выбарах. Яго затрымалі 2 верасня 2020-га.

«Справа PandaDoc» ад пачатку лічылася палітычнай з-за пазіцыі заснавальніка стартапа Мікіты Мікада. Пасля выбараў ён заснаваў фонд дапамогі сілавікам, якія вырашылі звольніцца з органаў па меркаваннях сумлення. Праз арышты супрацоўнікаў кампаніі ў Беларусі Мікада прыпыніў гэты праект.

Паводле «Еўрарадыё».