Вользе Класкоўскай вынеслі новы прысуд. Шляхам складання тэрмінаў — 2,5 гады калоніі

Новую справу на Класкоўскую пачалі, калі яна ўжо адбывала тэрмін у гомельскай жаночай калоніі. Год таму яе асудзілі на два гады калоніі за ўдзел у пратэстах у 2020 годзе. Цяпер яе судзілі паводле арт. 369 Крымінальнага кодэкса («Абраза прадстаўніка ўлады») — нагодай стаў каментар на адрас брэсцкага міліцыянта.

Суд Маскоўскага раёна Брэста прысудзіў Вользе Класкоўскай за «абразу прадстаўніка ўлады» 1,5 года «хатняй хіміі». Шляхам складання тэрмінаў палітзняволенай прызначылі 2 гады і 6 месяцаў калоніі агульнага рэжыму.

Сама Класкоўская ў судзе ўдзельнічаць адмовілася, назваўшы яго незаконным і несправядлівым. Як паведамляюць праваабаронцы, са словамі «Жыве Беларусь!» яна пакінула пасяджэнне.