За параўнанне дырэктаркі школы з нацысткай блогера чакае суд

Як паведамляе Радыё Свабода, дырэктарка сярэдняй школы № 3 Гомеля Ніна Старажэнка ў заяве ў міліцыю вінаваціць мясцовага блогера ў знявазе гонару і годнасці.

У застаўцы да YouTube-відэа пра шматдзетную сям’ю блогер Арцем Шапораў зрабіў фотакалаж: «адзеў»  дырэктарку школы ў чорную нацысцкую ўніформу. Тым часам школа № 3 носіць імя Героя Савецкага Саюзу Дзмітрыя Пенязькова.
«У мяне не было намераў кагосьці абразіць, непажаданыя сымбалі ў застаўцы зафарбаваныя. Як аўтар я меўся паказаць праз аватарку сутнасць таго, што вакол нас адбываецца», — сказаў Свабодзе Арцём Шапараў.
У відэасюжэце блогер расказаў гісторыю шматдзетнай маці і яе чатырох дзяцей-школьнікаў. Дзве дачкі Антаніны Шайнюк вучацца ў СШ № 3.

Дырэктарка школы Ніна Старажэнка папярэджвала Антаніну Шайнюк, што прышле камісію, каб сям’ю паставілі на ўлік як сацыяльна ненадзейную. Прычына, названая педагогам: несвоечасовая аплата камунальных плацяжоў, беспарадак, абадраныя шпалеры, той факт што дачок Антаніны часьцяком даглядае бабуля, а таксама непрыемныя пахі ад сабакі, якога "трэба ўсыпіць".
Антаніна Шайнюк, у сваю чаргу, кажа, што бяз мужа, які заўчасна памёр, ёй няпроста гадаваць дзяцей. Шпалеры яе турбуюць мала яна лічыць, што дзяцей найперш «трэба накарміць, адзець, выхаваць у дабрыні і шчырасці».
«Так, я сапраўды напісала заяву ў міліцыю, бо блогер мяне абразіў гэтай уніформай», — пацвердзіла Ніна Старажэнка.
Участковы Савецкага райаддзелу міліцыі склаў на блогера Шапарава адміністрацыйны пратакол па артыкуле 17.10 КаАП — прапаганда і (ці) публічнае дэманстраванне, выраб і (ці) распаўсюд нацысцкай сымболікі альбо атрыбутыкі. Пратакол накіраваны ў суд. Артыкулам прадугледжана пакаранне — штраф да 10 базавых велічыняў альбо адміністрацыйны арышт.
Дата суда пакуль невядомая.