Журналісцкія саюзы Беларусі і Еўропы заклікаюць расійскіх прапагандыстаў адмовіцца ад трансляцыі хлусні

Журналісцкія саюзы Літвы, Беларусі, Германіі, Латвіі, Эстоніі і Польшчы выступілі з адкрытым зваротам да расійскіх прапагандыстаў, у якім нагадалі пра адказнасць «за саўдзел у развязванні вайны і забойстве мірных грамадзян».

І заклікалі адумацца і сысці «з гэтай вар'яцкай каруселі крывадушнасці, подласці і падману», паведамляе АФН са спасылкай на Delfi.lt.

«На вас — працоўных расійскіх СМІ ляжыць непасрэдная і прамая адказнасць за развязаную пуцінскім рэжымам чарговую вайну. Вы доўгія гады ігнаравалі важны пастулат журналістыкі — праверку інфармацыі. Вы транслявалі хлусню з Крамля і ў дадатак разганялі яе градус, наладжваючы доўгаграючыя псеўдаабмеркаванні, пры тым не дапушчаючы ніякага іншадумства па сутнасці.

Вы хлусілі расійцам наконт уварвання расійскіх войскаў у Грузію ў 2008-м; незаконны і нелегітымны “рэферэндум” у Крыме ў 2014-м выдаваўся вамі па крамлёўскіх метадычках за “ўрачыстасць народнага волевыяўлення”; і цяпер ад вас аўдыторыя чуе пра нацыстаў, якія існуюць толькі ў маніякальнай свядомасці аднаго кволага баязлівага чалавечка, які замкнуўся ў глыбокім бункеры нават ад сваіх змоўшчыкаў. Трызненне і словаблудства не заўсёды літаральна цвярозых і адэкватных праўладных спікераў выдаваліся вамі за ісціну ў апошняй інстанцыі.

Цяпер жа кроў дзяцей і старых Украіны, скалечаныя лёсы адурманеных расійскіх салдат — і на вашым сумленні. Так, пуцінскі рэжым жорсткі. Так, не ва ўсіх знойдуцца душэўныя сілы казаць праўду ў мікрафоны і тэлекамеры. Але заўсёды ёсць магчымасць адмовіцца — нават не звольніцца, проста не выдаваць хлусню голасна. Не браць у рукі паперак з “навінамі”, зляпанымі ў Крамлі — над якімі смяюцца разважлівыя людзі ўсёй планеты. Калі салідарнасць пераможа — у рэжыму не знойдзецца штрэйкбрэхераў для гэтай бруднай і забойнай працы.

Сёння — вызначальныя гадзіны. Пуцінская кліка, якая не раз перапісвала Канстытуцыю дзеля ўтрымання ўлады — знішчыла эканоміку краіны. Вы — прамыя саўдзельнікі і памагатыя гэтага злачыннага рэжыму. Калі ласка, не марнуйце час на ток-шоў і вялізныя сюжэты а-ля “як бы нам пазбегнуць санкцый”. Кажаце прама — з-за чаго гэтыя санкцыі ўведзеныя. Не хапае мужнасці — зноў жа, сыдзіце ў бок: вазьміце бальнічныя, выпраўцеся ў адпачынак, вазьміце адпачынак без утрымання. За пару тыдняў людзі, якія засталіся без інфармацыйнага дурману — сам-насам з пустымі паліцамі — самі зробяць належныя высновы.

Яшчэ раз — сёння яшчэ ёсць магчымасць выйсці з гэтай пасткі, у якую вы, вольна або мімаволі, трапілі. Магчыма, вы страціце працу, магчыма ў кагосьці ёсць іпатэка — але ўдумайцеся, калі краіна зменіцца — праца ваша вернецца. А вось нашто вам іпатэчныя кватэры, у якія вы потым не зможаце купіць ні шпалеры, ні плітку, ні кран на кухню — вялікае пытанне. І вы рызыкуеце стаць на доўгія гады прадстаўнікамі апошняга пакалення расійцаў, якое свабодна выязджала за мяжу, або набывала добры аўтамабіль.

Перастаць працаваць на пуцінскую прапаганду цяпер — значыць, пазбегнуць крымінальнага пераследу. Дзеючыя расійскія законы, хоць і прынятыя пуцінскім рэжымам, цалкам дазваляюць асудзіць кожнага, хто спрыяў распаўсюджванню хлусні з Крамля за прапаганду агрэсіўнай вайны. Акрамя таго, расследаванне злачынстваў расійскай ваеншчыны ва Украіне ўжо вядзецца Міжнародным крымінальным судом у Гаазе. Палонныя расійскія салдаты ўжо даюць паказанні, што былі ашуканы сваімі камандзірамі, а таксама расійскім тэлебачаннем і радыё — і гэта стане дастатковай падставай для ўзбуджэння крымінальных спраў у дачыненні да ўсіх, хто будзе адзначаны ў эфіры і ў друку з выкладаннем ілжывых паведамленняў ад падпальшчыкаў вайны.

Такі маніторынг пачынаецца з 00:00 дня, наступнага за днём публікацыі гэтага маніфесту. І прозвішчы тых, хто працягне заліваць Расію патокамі фэйкаў будуць тыражавацца ў вядучых сусветных СМІ. Маргарыта Сіманян, да прыкладу, хутка будзе аб'яўлена ў міжнародны вышук. Яна — першая, але далёка не апошняя. Чалавецтва спаўна аддасць тым, хто забыў урокі Другой Сусветнай вайны. Галоўны з іх — саўдзел у развязванні вайны і забойстве мірных грамадзян — найцяжэйшае злачынства. І страшны грэх, калі словы пра веру яшчэ здольныя крануць вашы душы.

Нагадаем вам пра лёс Ганса Фрычэ — кіраўніка імперскага радыё Трэцяга Рэйха. Ён быў асуджаны да 9 гадоў турмы — толькі за ўдзел у нацысцкай прапагандысцкай машыне. І памёр у камеры-адзіночцы. Падумайце, калі розум яшчэ не пакінуў вас — вашы начальнікі, аддаючы загады публікаваць хлусню, не робяць гэтага ў пісьмовай форме. І калі настане час расплаты — яны заявяць, каб змякчыць сваю долю, што вы гэта ўсё рабілі па ўласнай волі. Вам здрадзяць. Як здраджваюць расійскія генералы сваім салдатам і афіцэрам, кідаючы іх паўапранутымі і галоднымі на волю лёсу.

А разам з крымінальнымі справамі і суровымі прысудамі вам будуць адрасаваныя яшчэ і пазовы тысяч сваякоў тых, хто загінуў ва Украіне ад расійскіх снарадаў і бомбаў. І вашых іпатэчных кватэр дакладна не хопіць, каб па іх разлічыцца. Не ператварайце ж сваё жыццё, жыццё сваіх бацькоў і дзяцей, жыццё ўсіх расійцаў у пекла! Сыдзеце з гэтай вар'яцкай каруселі крывадушнасці, подласці і падману. Пакіньце галоўнага злачынца аднаго — пад страхам немінучай адплаты. Прама цяпер. Заўтра можа быць позна!».

Свае подпісы пад зваротам паставілі старшыня Беларускай асацыяцыі журналістаў Андрэй Бастунец, прэзідэнт Саюза журналістаў Эстоніі Хеле Ційкмаа, старшыня Нацыянальнага савета каналаў грамадскага доступу Вольфганг Рысман (Германія), член праўлення Саюза журналістаў Латвіі Імантс Ліепіньш, старшыня праўлення Латвійскай асацыяцыі журналістаў Ілля Козіньш, старшыня Саюза журналістаў Літвы Дайнюс Радзявічус, старшыня польскай асацыяцыі журналістаў Кшыштаф Скаўроньскі.