Абраная найлепшая паэтычная кніга года

20 верасня, у дзень 115-годдзя Наталлі Арсенневай адбылася цырымонія ўручэння паэтычнай прэміі. Найлепшай паэтычнай кнігай 2017 г. была названая «Перавыбранае».

Паэтычная кніга “Перавыбранае”Алеся Разанава адзначаная журы прэміі найлепшай паводле сумы мастацкіх адкрыццяў у разнастайных наватарскіх жанрах, якія, пашыраючы інтэлектуальныя далягляды беларускай культуры, змянілі і працягваюць мяняць аблічча сучаснай паэзіі.
На перамогу прэтэндавалі наступныя кнігі:

• Алесь Разанаў. Перавыбранае. Выдавецтва Змітра Коласа, Мінск.
  
• Антон Францішак Брыль. Цмачанка. Выдавецтва “Янушкевіч”, Мінск.
  
• Вальжына Морт. Эпідэмія ружаў. Выдавецтва “Логвінаў”, Вільня.
  
• Валянціна Аксак. Завінены рай. Выдавецтва “Галіяфы”, Мінск.
  
• Вольга Гапеева. Граматыка снегу. Выдавецтва “Галіяфы”, Мінск.
  
• Ігар Кулікоў. Валадар загадак. Выдавецтва “Медысонт”, Мінск.
  
• Іна Снарская. Вогнепаклонніца. Выдавецтва “Кнігазбор”, Мінск.
  
• Міхаіл Рубін. Пераклад з Іншага. “Издательские решения” па ліцэнзіі Ridero.
  
• Усевалад Сцебурака. Сны дарог. Выдавецтва “Медысонт”, Мінск.
  

У склад журы прэміі Арсенневай 2018 увайшлі паэт і перакладчык Андрэй Хадановіч, літаратуразнаўца і пісьменніца Вольга Іпатава, паэт і выдавец Дзмітрый Строцаў,паэтка і перакладчыца Марыя Мартысевіч ды паэтка Наста Кудасава.
Літаратурная прэмія імя Наталлі Арсенневай ушаноўвае аўтара ці аўтарку найлепшай паэтычнай кнігі на беларускай мове, выдадзенай у папярэднім Прэміі годзе. Арганізатары прэміі — Беларускі ПЭН-цэнтр, ГА “Саюз беларускіх пісьменнікаў” і Згуртаванне беларусаў свету “Бацькаўшчына”. Узнагарода ўручаецца пры падтрымцы Фонду культуры і адукацыі Орса-Рамана і Харытатыўнага фонда Згуртавання беларусаў Вялікай Брытаніі.
Прэмія заснаваная ў гонар беларускай паэткі Наталлі Арсенневай (1903—1997) у 2017 г. і ўручаецца за найлепшую паэтычную кнігу на беларускай мове. Першым лаўрэатам прэміі стаў Уладзімір Някляеў за зборнік паэзіі “Толькі вершы”.
Паводле прэс-службы ГА "Саюз беларускіх пісьменнікаў"