Літаратурную прэмію імя Францішка Аляхновіча сёлета ўручаць ня будуць

Сёньня, 15 лістапада, у сьвеце адзначаецца Дзень зьняволенага пісьменьніка і звычайна абвяшчаюцца ляўрэаты прэміі імя Францішка Аляхновіча за найлепшы твор, напісаны ў зьняволеньні. Сёлета заснавальнікі прэміі, «Р*дыё Свабода» і Беларускі ПЭН, вырашылі перанесьці цырымонію ўзнагароды на 2023 год.

Як патлумачыла «Св*бода», няспынныя рэпрэсіі, арышты аўтараў і выдаўцоў цягам мінулага году зрабілі амаль немагчымым публічнае зьяўленьне твораў, напісаных у зьняволеньні. Цяпер за кратамі 11 ляўрэатаў прэміі: Ігар Аліневіч, Аляксандар Фядута, Павал Севярынец, Зьміцер Дашкевіч, Алесь Бяляцкі, Мікола Дзядок, Алесь Пушкін, Андрэй Аляксандраў, Максім Знак, Мікола Папека, Андрэй Скурко.

Беларускі ПЭН адсочвае і фіксуе храналёгію Людзей Слова — літаратараў, перакладнікаў і дасьледнікаў літаратуры, публіцыстаў, інтэлектуалаў, а таксама тых, хто стварае і пашырае культуру, бароніць слова і яго майстроў, якія цяпер за кратамі.

Зь лістоў з турмаў і калёніяў, са зьвестак ад родных і сяброў дакладна вядома, што рэпрэсіі не спынілі творчую актыўнасьць. Беларускі ПЭН і «Радыё Свабода» выказваюць упэўненасьць, што творы абавязкова дойдуць да чытачоў, а іх аўтары атрымаюць вядомасьць і прызнаньне.

Прысуджэньне прэміі імя Францішка Аляхновіча пераносіцца на Дзень зьняволенага пісьменьніка налета. На разгляд будуць прымацца творы, апублікаваныя цалкам ці часткова ў пэрыяд зь лістапада 2021-га па лістапад 2023 года.

Арганізатары просяць сваякоў, сяброў зьняволеных зьбіраць і захоўваць творчасьць з-за кратаў, перадаць вязьням запросіны ўдзельнічаць у стварэньні літаратуры памяці і пажаданьні хуткай свабоды.

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: