«Мая адзіная Зорка-лёс». За кратамі Кацярына Андрэева піша вершы

Журналістка Кацярына Андрэева, асуджаная на 2 гады пазбаўлення волі за выкананне сваёй прафесійнай дзейнасці, піша ў калоніі вершы.

Звычайна яны не для публікацыі, але адзін, напісаны яшчэ ўзімку, яе муж, таксама журналіст Ігар Ільяш запосціў у Фэйсбуку.

Над белым полем —
Зімовым морам
У цішыні
І сярод турбот
Над маім шчасцем
І маім болем
Каторы месяц,
Які ўжо год
Ляціць, трымціць,
Невымоўна ззяе
На чорнай коўдры
Родных нябёс
Мая самотная
І нямая
Мая адзіная
Зорка-лёс.
Я ёй малюся,
Яе баюся
Яе спрабую
Не заўважаць.
А прыйдзе час —
Назаўжды спынюся
Пад зорным позіркам
Спачываць.
Пакуль блукаю
Глухою сцежкай
Дзе звер пакінуў
Свае сляды
Ужо не страшна,
Ужо не смешна
Ужо ніякай
Няма бяды
У тым што сціхлі
Навокал песні
А замест песняў —
Хрусцяць хрыбты.
У любым краі,
Дзе на прадвесні
У вакно астрогу
Мне ззяеш Ты.

Паводле БАЖ

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: