З украінскай школьнай праграмы прыбяруць Васіля Быкава і рускіх пісьменнікаў

З праграмы па літаратуры ў ўкраінскіх школах прыбяруць творы расійскіх і савецкіх пісьменнікаў і паэтаў. Замест іх у праграму дададуць творы сусветных пісьменнікаў. Такое рашэнне прыняла рабочая група Міністэрства адукацыі і навукі Украіны.

Рашэнне тлумачыцца псіхалагічным і фізічным траўміраваннем дзяцей у выніку ўварвання Расіі ў Украіну, а таксама «адсутнасцю ва ўмовах ваеннага становішча рэцэптыўнага кантэксту для вывучэння твораў расійскіх і беларускіх пісьменнікаў».

Пад раздачу трапілі каля 40 пісьменнікаў, у тым ліку Васіль Быкаў. Раней яго аповесць «Альпійская балада» вывучалі ў 7-м класе. У абноўленай праграме яе прапануецца замяніць раманам «Хлопчык у паласатай піжаме» Джона Бойна або раманам «Дзеці Ноя» Эрыка-Эманюэля Шміта.

З праграмы таксама знікнуць творы Аляксандра Пушкіна, Льва Талстога, Фёдара Дастаеўскага, Антона Чэхава, Міхаіла Лермантава, Міхаіла Булгакава, Івана Буніна, Восіпа Мандэльштама і іншых аўтараў.

Паводле reform.by.