Апячаталі дом Ігара Логвінава. Хронікі рэпрэсій 24 чэрвеня
Новыя выпадкі ціску на прадстаўнікоў незалежнай культуры і грамадзянскай супольнасці, продаж канфіскаванай маёмасці, праблемы з перарэгістрацыяй рэлігійных суполак і паведамленні пра спробы вярбоўкі беларусаў замежжа. Сабралі галоўнае пра палітычны пераслед у Беларусі за апошнія дні.
Беларусаў замежжа спрабуюць вярбаваць праз іх бацькоў
Праваабарончая ініцыятыва Dissidentby паведаміла пра шэраг выпадкаў, калі да бацькоў беларусаў, якія жывуць за мяжой, прыходзяць людзі, што патрабуюць кантакты іх дзяцей і пагражаюць магчымымі наступствамі. Паводле паведамленняў, такія візіты звязваюць з абвінавачаннямі ў сувязях з аналітычна-асветніцкім цэнтрам «Цэнтр новых ідэй», які ўлады прызналі «экстрэмісцкім фармаваннем» у 2025 годзе.
Апячаталі вясковы дом выдаўца Ігара Логвінава
Паводле інфармацыі Reform.news, на пачатку чэрвеня ўлады апячаталі вясковы дом выдаўца Ігара Логвінава.
Нагадаем, у сакавіку КДБ прызнаў «экстрэмісцкім фармаваннем» нібыта існуючую кааліцыю выдавецтваў «Фонд Kamunikat.org», «Lohvinau Publishing House» і «Andrei Yanushkevich Publishing». Паводле КДБ, да яе мелі дачыненне Яраслаў Іванюк, Зміцер Колас, Ігар Логвінаў, Вацлаў Багдановіч, Андрэй Янушкевіч і Аляксандр Яўдаха.
Выдавец Андрэй Янушкевіч раней заяўляў, што такой кааліцыі не існуе і яна была сфабрыкаваная сілавымі органамі.
Чатыры грэка-каталіцкія парафіі не прайшлі перарэгістрацыю
Як паведамляе Радыё Свабода са спасылкай на абазнаныя крыніцы, абавязковую перарэгістрацыю не прайшлі чатыры з 16 грэка-каталіцкіх парафій, зарэгістраваных у Беларусі. Гаворка ідзе пра суполкі ў Брэсце, Баранавічах, Івацэвічах і Оршы.
Масавая перарэгістрацыя рэлігійных арганізацый пачалася пасля прыняцця ў канцы 2023 года новай рэдакцыі закона аб дзейнасці рэлігійных арганізацый. Сярод новых патрабаванняў — забарона на палітычную дзейнасць, беларускае грамадзянства кіраўніка арганізацыі і наяўнасць не менш за 20 вернікаў для рэгістрацыі парафіі.
Прадалі канфіскаванае лецішча журналіста і праваабаронцы Уладзіміра Хільмановіча
Паводле «Гарадзенскай Праваабароны», канфіскаванае лецішча журналіста і праваабаронцы Уладзіміра Хільмановіча прадалі на аўкцыёне за 3242 рублі. У таргах удзельнічалі два чалавекі.
Раней у сям'і Хільмановіча таксама канфіскавалі і прадалі бытавую тэхніку, у тым ліку лядоўню, пральную машыну і тэлевізар.
У жніўні 2024 года Гродзенскі абласны суд завочна прысудзіў Хільмановічу пяць гадоў пазбаўлення волі ва ўмовах узмоцненага рэжыму і штраф у памеры 40 тысяч рублёў.
На продаж выставілі яшчэ некалькі ікон, арыштаваных у ксяндза Генрыха Акалатовіча
Паводле інфармацыі Хрысціянскай візі, на таргі выставілі яшчэ дзве іконы, канфіскаваныя ў ксяндза Генрыха Акалатовіча: «Вялікапакутніца Параскева Пятніца» і «Маці Божая Трох Радасцей».
Таксама паўторна выставілі ікону «Паўстанне Хрыста ад труны». Калі раней яе пачатковая цана складала 4000 рублёў, то цяпер — 3200 рублёў.
Раней у ксяндза ўжо арыштавалі і выставілі на продаж аўтамабіль, зямельны ўчастак і некалькі старажытных ікон.