Ціханоўскую і Латушку будуць судзіць завочна. Могуць забраць нерухомасць і пазбавіць грамадзянства

Намеснік старшыні Следчага камітэта Анатоль Васільеў заявіў аб пачатай «спецвытворчасці» ў дачыненні да членаў Аб'яднанага пераходнага кабінета. Гэтая справа «расследуецца сумесна з КДБ», цытуе яго «Позірк» са спасылкай на дзяржаўную «СБ. Беларусь сегодня».

maxresdefault_150.jpg

У спісе асоб, у дачыненні да якіх вядзецца спецвытворчасць, пакуль фігуруюць толькі двое членаў кабінета — яго стваральнік Святлана Ціханоўская і прадстаўнік па транзіце ўлады Павел Латушка. Калі СК аб'яўляў пра гэта ў кастрычніку, яны згадваліся як «прадстаўнікі так званага каардынацыйнага савета».

«На дадзены момант мы працягваем фіксаваць супрацьпраўную дзейнасць усіх удзельнікаў «пераходнага кабінета», — заявіў Васільеў. — Збеглых чакае толькі адзін канец, калі яны не адумаюцца».

Намеснік старшыні СК таксама паведаміў, што «са дня на дзень» будзе распачатая «спецвытворчасць» у дачыненні да былога прэтэндэнта на пасаду прэзідэнта Валерыя Цапкалы, і назваў яго «карупцыянерам і хабарнікам».

«Наступствы пачатку спецыяльнай вытворчасці таксама будуць: канфіскацыя маёмасці, таксама магчыма пазбаўленне грамадзянства», — дадаў чыноўнік.