Чарговае «памілаванне» і новыя справы. Хронікі рэпрэсій 5 сакавіка

 У Беларусі памілавалі 15 палітычных зняволеных, большасць з якіх — жанчыны. У Віцебску распачалі новую крымінальную справу за каментары трохгадовай даўніны, КДБ папоўніў «тэрарыстычны спіс», а былога спецназаўца і сістэмнага адміністратара Беларускай чыгункі асудзілі па палітычнай справе.

У Беларусі памілавалі 15 палітычных зняволеных

Агулам пад памілаванне трапілі 18 чалавек, з якіх 15 былі асуджаныя за «злачынствы экстрэмісцкай накіраванасці».

Большасць памілаваных — 11 чалавек — жанчыны. У шасці з іх ёсць дзеці, у тым ліку дзеці з інваліднасцю, якія маюць патрэбу ў пастаяннай медыцынскай рэабілітацыі.

Сярод памілаваных — дзве сямейныя пары, жанчына на апошніх тэрмінах цяжарнасці і адна зняволеная, якая была асуджаная ў 16-гадовым узросце.

Паводле падлікаў праваабаронцаў, пасля падзей 2020 года ў Беларусі памілавалі або вызвалілі па амністыі як мінімум 605 палітзняволеных. За той жа перыяд статус палітычнага зняволенага атрымалі 4499 чалавек — людзі рознага ўзросту і сацыяльнага становішча, абвінавачаныя паводле розных крымінальных артыкулаў.

У Віцебску распачалі справу за каментары трохгадовай даўніны

У Віцебску распачалі новую крымінальную справу за «абразу Лукашэнкі». Яе ўжо накіравалі ў суд, і разгляд павінен адбыцца ў бліжэйшы час.

Фігурант — 39-гадовы жыхар абласнога цэнтра. Яго будуць судзіць за два каментары ў Telegram, пакінутыя каля трох гадоў таму.

Паводле версіі абвінавачання, мужчына пакінуў «каментары, якія ўтрымліваюць абразлівыя словы і выказванні ў адрас кіраўніка дзяржавы і прыніжаюць яго гонар і годнасць».

Як паведамляюць прапагандысцкія рэсурсы, гэтыя каментары пазней былі выдаленыя аўтарам. Аднак іх удалося аднавіць — і цяпер яны сталі падставай для крымінальнага абвінавачвання, піша @vicspring.

«Тэрарыстычны спіс» папоўніўся яшчэ трыма імёнамі

Камітэт дзяржаўнай бяспекі абнавіў пералік «асоб, якія маюць дачыненне да тэрарыстычнай дзейнасці». У яго дадалі яшчэ трох чалавек:

— Глеба Рыбчанку

— Віталя Абадзенку

— Дзмітрыя Каліноўскага.

Цяпер у «тэрарыстычным спісе» 1424 чалавекі, з якіх каля 700 — беларусы.

Сістэмнага адміністратара БЧ асудзілі па палітычнай справе

48-гадовы Дзмітрый Каліноўскі — былы спецназавец і сістэмны адміністратар Беларускай чыгункі.

Пасля школы ён прайшоў тэрміновую службу ў 5-й асобнай брыгадзе спецыяльнага прызначэння ў Мар'інай Горцы. У 2002 годзе завочна скончыў БДУІР па спецыяльнасці «камп’ютарныя сістэмы і сеткі».

З 2000 года Каліноўскі працаваў сістэмным адміністратарам на Беларускай чыгунцы і займаўся наладкай сеткавага абсталявання.

Мінскі гарадскі суд прызнаў яго вінаватым паводле ч. 3 арт. 361 КК — «заклікі да мер абмежавальнага характару або іншых дзеянняў, накіраваных на прычыненне шкоды нацыянальнай бяспецы».

Мужчына адбывае пакаранне, імаверна ў калоніі, піша «Наша Ніва».