«Днямі з боку кіраўнікоў некаторых дзяржаў...» Прэзідэнт Узбекістана адказаў Лукашэнку

Прэзідэнт Узбекістана Шаўкат Мірзіёеў падчас пасяджэння узбекскага Савета Бяспекі адрэагаваў на выказванне Лукашэнкі, зробленае 10 студзеня на пасяджэнні Савета АДКБ.

Лукашэнка тады сказаў, гаворачы пра падзеі ў Казахстане і абвінавачваючы ў іх міжнародных экстрэмістаў:

«Калі гэтыя ўрокі не будуць засвоеныя, па нашай інфармацыі, … іх погляды ў тым ліку кінутыя і на Узбекістан».

Паводле прэс-сакратара ўзбекскага прэзідэнта Шэрзада Асадава, Мірзіёеў сёння сказаў:

«Днямі з боку кіраўнікоў некаторых дзяржаў былі зробленыя неабгрунтаваныя заявы аб тым, што Узбекістан павінен атрымаць урокі з падзей, якія адбыліся ў Казахстане».

Па словах Мірзіёева, улады Узбекістана і так уважліва сочаць за сітуацыяй у рэгіёне, а краіна мае ўсё неабходнае для адэкватнага рэагавання на любую пагрозу.

Відаць, такім чынам Шаўкат Мірзіёеў адказаў на намёк, што варта было б Узбекістану таксама аднавіць сяброўства ў АДКБ. Узбекістан уваходзіў у склад арганізацыі ў 1992-1999 і 2006-2010 гадах, але тагачасны прэзідэнт Іслам Карымаў двойчы прымаў рашэнне аб выхадзе з яе.

Паводле «Нашай Нівы».

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,

Больш цікавага на «Новым Часе»: