Куды знік Лукашэнка? Паляцеў да Пуціна, але ў Беларусь не вярнуўся

Учора Аляксандр Лукашэнка накіраваўся на чарговую сустрэчу з Уладзімірам Пуціным. Увечары прапагандысцкія медыя распаўсюдзілі інфармацыю аб перамовах у рэзідэнцыі расійскага кіраўніка ў Нова-Агарове.

Нічога сенсацыйнага прапагандысты не паказалі. Звычайная размова двух палітыкаў пенсійнага ўзросту. У асноўным пра эканоміку і тавараабарот, нібыта няма ва Украіне аніякай вайны. Але вось дзіва: той жа лукашэнкаўскі рупар тэлеграм-канал «Пул Першага» абмежаваўся літаральна некалькімі паведамленнямі аб сустрэчы, а пасля нібыта ў рот вады набраў. Як і іншыя дзяржаўныя СМІ.

Гэта вельмі кантрастуе са звычайнымі (і вельмі рэдкімі) візітамі Лукашэнкі за мяжу. Іх прапаганда асвятляе з неверагодным імпэтам, апавядаючы ледзь не пра кожны крок свайго куміра. Дастаткова ўзгадаць нядаўнюю паездку ў Зімбабвэ — захлёбваючыся, дзяржаўны агітпрап званіў пра яе ў званы колькі дзён запар.

А тут, здавалася б, найлепшы саюзнік, усходні сябар, з якім столькі пройдзена ў бесперапынных крыжовых паходах супраць калектыўнага Захаду… І на табе: у дзяржаўных медыя пра чарговую сустрэчу пануе вакуум.

Дык ці дамовіліся да чаго-небудзь? Ці падпісалі якія-небудзь дакументы? Што там з інтэграцыяй, крэдытамі, імпартазамяшчэннем? Нарэшце, што з далейшай вайной, гадавіна пачатку якой якраз на падыходзе? Дай адказ. Не дае адказу.

Не было інфармацыі і пра вяртанне Лукашэнкі дадому. Паводле некаторых звестак, ён пакуль застаецца ў Расіі.

Выданне Reform.by між тым заўважыла ў анлайн-сервісах, што Boeing 737-800 з бартавым нумарам EW-001PA, на якім Лукашэнка паляцеў у Маскву, сёння а 14:02 MSK вылецеў з маскоўскага аэрапорта «Унукава» і прызямліўся ў Цвярской вобласці РФ.

Ці знаходзіцца на борце сам Лукашэнка, або борт перагналі ў Цвярскую вобласць без 68-гадовага пасажыра, пакуль не ясна.

Выданне нагадвае, што ў Цвярской вобласці на тэрыторыі нацыянальнага парку «Завідава» знаходзіцца дзяржаўная рэзідэнцыя «Русь». У чэрвені 2022 года Лукашэнка ўжо быў у гэтай рэзідэнцыі на запрашэнне Пуціна. Тады ён знік на некалькі дзён і пра яго лёс таксама нічога не было вядома. Потым Лукашэнка і Пуцін усё ж з'явіліся на публіцы, затым паехалі ў Санкт-Пецярбург і там Лукашэнку паказалі порт «Бронку». У пачатку лютага 2023 года стала вядома, што порт «Бронка» можа быць перададзены беларускаму боку.

Навошта Лукашэнка паляцеў у Маскву? Выбіваць даўгі за экспарт?

Раней паведамлялася, што 21 лютага Пуцін звернецца з пасланнем да Федэральнага сходу. На наступны дзень плануюцца пасяджэнні абедзвюх палат расійскага парламента, а таксама мітынг з удзелам Пуціна. У Маскву з візітам прыбыў так званы прэзідэнт Абхазіі Аслан Бжанія, а 22 лютага там чакаюць кіраўніка яшчэ адной непрызнанай тэрыторыі — Паўднёвай Асеціі Алана Гаглаева.