Новае «экстрэмісцкае фармаванне», затрыманні і прысуд. Хронікі рэпрэсій 29 красавіка
У Беларусі працягваецца крыміналізацыя медыя і культурных ініцыятыў, адбываюцца масавыя затрыманні, а людзей асуджаюць па палітычных артыкулах.
МУС прызнаў «Reform.news» «экстрэмісцкім фармаваннем»
Адпаведнае рашэнне прыняло МУС.
Паводле ведамства, дачыненне да праекта маюць Паўлючэнка Фёдар, Атрошчанкаў Аляксандр і Жукаў Аляксей.
У Наваполацку прайшоў «хапун» за «сувязі з экстрэмістамі»
23 красавіка ў горадзе былі затрыманыя не менш за 12 жанчын. Ва ўсіх правялі ператрусы, некалькі чалавек адразу адвезлі ў віцебскі СІЗА, астатніх дапытвалі ў Наваполацку. Восем чалавек адпусцілі ў той жа вечар, паведамляе «Віцебская Вясна».
У адной з затрыманых знайшлі падпіскі на «экстрэмісцкія» інфармацыйныя рэсурсы — яе пратрымалі пад вартай трое сутак і ў мінулы панядзелак асудзілі да адміністрацыйнага штрафу.
Вядома, што на ўчорашні дзень прынамсі дзве жанчыны заставаліся за кратамі.
З усіх жанчын узялі падпіскі аб нявыездзе і неразгалошванні. Аднак, паводле іншых крыніц, затрыманні былі звязаныя з культурніцкімі праектамі і сталі наступствам таго, што 9 красавіка МУС прызнаў «экстрэмісцкім фармаваннем» шэраг культурных ініцыятыў.
Пра гэта было абвешчана толькі 24 красавіка, а затрыманні адбыліся напярэдадні.
Прычым не толькі ў Наваполацку: вядома, што трох жанчын 23 красавіка затрымалі ў Барысаве, яшчэ некалькі — у Слоніме, Брэсце і Жодзіне.
Палітзняволенай айцішніцы прысудзілі тры гады па «справе Гаюна»
Вользе Буланавай 43 гады. Яна з Бабруйска. Пасля заканчэння мясцовага аграрна-эканамічнага каледжа ў 2004 годзе яна ўладкавалася аператаркай ПЭВМ на Бабруйскую абутковую фабрыку.
Аддаўшы фінансам больш за 10 гадоў, Буланава вырашыла кардынальна змяніць жыццё. У 2018–2019 гадах яна прайшла навучанне ў IT Academy і атрымала прафесію UI/UX-дызайнеркі, пасля чаго знайшла працу ў IT.
Паводле інфармацыі з сацсетак, да затрымання яна жыла ў Літве, але перыядычна ездзіла ў Беларусь. У жанчыны ёсць муж і дзіця, піша «Наша Ніва».
Вольгу арыштавалі 21 мая 2025 года і змясцілі ў СІЗА. Яе асудзілі ў Мінскім гарадскім судзе паводле частак 1 і 2 артыкула 361-4 КК (садзейнічанне экстрэмісцкай дзейнасці).
3 студзеня ёй прысудзілі тры гады калоніі.