Справы за кеды, новыя палітвязні і жорсткія прысуды. Хронікі рэпрэсій 16 лютага
Адміністрацыйная справа супраць гандлёвай сеткі за абрэвіятуру ACAB, восем новых палітвязняў, прысуды IT-спецыялісту і завочны працэс у Брэсце, а таксама канчатковае рашэнне Вярхоўнага суда па справе «Чорных салаўёў». Агляд асноўных падзей.
Супраць «Мегатопа» распачалі справу за «распаўсюд экстрэмізму»
Супраць кампаніі «Мегатоп» распачалі адміністрацыйную справу за «распаўсюд экстрэмісцкай сімволікі» (арт. 17.11 КаАП). Падставай сталі кеды з абрэвіятурай ACAB.
Англійская абрэвіятура ACAB расшыфроўваецца як all cops are bastards — «усе копы — выб***кі». Раней яе выкарыстоўвалі падчас забастовак працоўных у Вялікабрытаніі і ў турэмных татуіроўках, пазней яна стала папулярнай сярод пратэстоўцаў у розных краінах, а таксама ў асяроддзі футбольных фанатаў і скінхэдаў, піша «Наша Ніва».
«Мегатоп» выставіў на сайце ў продаж кеды з гэтай абрэвіятурай. Літары ACAB былі выкананыя ў стылі графіці — менавіта ў такім выглядзе яе часта выкарыстоўваюць. На сайце пазначалася, што гэта навінка. Кошт складаў 49,69 рубля за меншыя памеры (лінейка пачыналася з 30-га памеру) і каля 54 рублёў — за большыя.
Пасля публікацыі пра гэта ў тэлеграм-канале прапагандыста Грыгорыя Азаронка кеды зніклі з продажу прыкладна праз 30 хвілін. Паведамляецца, што ў дачыненні да кампаніі распачалі адміністрацыйную справу.
У Беларусі +8 новых палітвязняў
Палітвязнямі прызнаныя Дзмітрый Барсукоў, Ігар Губарэвіч, Павел Вахлакоў, Віталь Новікаў, Аляксандр Сульжыц, Сяргей Лагвіновіч, Віталь Кушнярэвіч і Аляксандр Хазееў.
Як паведамляе праваабарончы цэнтр «Вясна», іх зняволілі ў сувязі з узаемадзеяннем з «экстрэмісцкімі фармаваннямі». Аляксандра Хазеева таксама абвінавацілі паводле арт. 361, 367 і 368 КК — у закліках да санкцый, абразе Аляксандра Лукашэнкі і паклёпе на яго.
IT-спецыяліста з Мінска асудзілі па чатырох палітычных артыкулах
Міхаілу Горбачу 43 гады. Ён мінчук, у 2003 годзе скончыў факультэт радыёфізікі і камп’ютарных тэхналогій БДУ.
З 2014 года працаваў як індывідуальны прадпрымальнік — займаўся тэхнічным абслугоўваннем офіснай тэхнікі, быў сістэмным адміністратарам у некалькіх мінскіх кампаніях. Захапляецца футболам, ездзіў на міжнародныя турніры, у тым ліку на чэмпіянат Еўропы 2012 года.
У верасні 2024 года мужчына адпачываў у Егіпце. Пасля гэтага ён знік з сацыяльных сетак, піша «Наша Ніва».
Горбача судзілі ў Магілёўскім абласным судзе. Яго абвінавацілі паводле чатырох артыкулаў КК: ч. 1 арт. 130 («распальванне варожасці»), ч. 1 арт. 368 («абраза Лукашэнкі»), арт. 369 («абраза прадстаўніка ўлады») і ч. 3 арт. 361-1 («уваходжанне ў склад экстрэмісцкага фармавання»). Прысуд, верагодна, звязаны з пазбаўленнем волі.
Пачынаецца завочны суд над Дзмітрыем Банітам
40-гадовага Дзмітрыя Баніту пачынае завочна судзіць Брэсцкі абласны суд.
Яго абвінавачваюць паводле пяці артыкулаў КК: ч. 1 арт. 130 («распальванне сацыяльнай варожасці»), арт. 369 («абраза прадстаўнікоў улады»), арт. 364 («гвалт у дачыненні да міліцыянтаў»), арт. 188 («паклёп») і арт. 203-1 («незаконныя дзеянні ў дачыненні да інфармацыі аб прыватным жыцці і персанальных даных»).
Вярхоўны суд пакінуў у сіле прысуды па справе «Чорных салаўёў»
Судовая калегія па крымінальных справах Верховный суд Республики Беларусь адхіліла скаргу на прысуд асобам, абвінавачаным у стварэнні анархісцкай ячэйкі «Чорныя салаўі». Прысуд пакінуты без змяненняў і ўступіў у законную сілу, піша «Позірк».
Марыя Місюк асуджаная на 13 гадоў пазбаўлення волі, Сяргей Жыгалеў і Трафім Барысаў — на 12 гадоў, Зміцер Захарошка — на 10 гадоў і 6 месяцаў, Аляксандра Пуліновіч — на 10 гадоў і 3 месяцы.
Абвінавачанне сцвярджала, што яны рыхтаваліся да незаконнага вырабу самаробнай выбуховай прылады і нібыта планавалі падарваць Баранавіцкі РАУС.