Прысуды па справе BYSOL і новыя «экстрэмісцкія» старонкі. Хронікі рэпрэсій 17 лютага
Мінскі гарадскі суд асудзіў чатырох чалавек па справе BYSOL, у Магілёве і Гродне прызнаюць «экстрэмісцкімі» старонкі і сімвалы, а былога супрацоўніка сістэмы МУС накіравалі на «хімію» за «садзейнічанне экстрэмізму». Агляд асноўных падзей.
Чатырох чалавек асудзілі па справе BYSOL
Мінскі гарадскі суд вынес прысуд чатыром жыхарам Мінска, якіх следства назвала «кур’ерамі» ініцыятывы BYSOL. Ім інкрымінавалі ч. 3 арт. 361-1 КК — «удзел у экстрэмісцкім фармаванні». Адной з фігурантак дадаткова прад’явілі абвінавачанне паводле ч. 1 арт. 342 КК — «актыўны ўдзел у дзеяннях, што груба парушаюць грамадскі парадак».
Паводле версіі следства, абвінавачаныя атрымлівалі і перадавалі грошы іншым удзельнікам ініцыятывы і нібыта размяркоўвалі іх «на патрэбы незаконнай пратэснай і экстрэмісцкай дзейнасці».
Прадстаўнік фонду Зміцер Ягораў заявіў @euroradio, што арганізацыя не выкарыстоўвае кур’ераў для перадачы грошай унутры Беларусі:
«Наша арганізацыя не карыстаецца кур’ерамі для перадачы грошай унутры Беларусі. Мы робім усё, каб не падвяргаць людзей небяспецы. Тое, што ў Мінску асудзілі чатырох чалавек, прыпісваючы ім ролю кур’ераў BYSOL, — прыклад пошуку палітычных ворагаў і хлусні з боку сілавікоў. Гэтыя людзі асуджаныя несправядліва і з палітычных матываў. Яны ніколі не былі кур’ерамі BYSOL, бо BYSOL не меў кур’ерскай сеткі ў Беларусі».
Двум фігурантам прызначылі па 2 гады пазбаўлення волі, яшчэ аднаму — 3 гады. Жанчыне, якой дадаткова інкрымінавалі ўдзел у пратэстах, таксама прызначылі 3 гады пазбаўлення волі. Акрамя таго, кожнаму з іх прызначылі штраф у памеры 500 базавых велічыняў.
Instagram-старонку «FreeViasna» прызналі «экстрэмісцкай»
11 лютага суд Ленінскага раёна Магілёва прызнаў «экстрэмісцкай» Instagram-старонку «FreeViasna».
Таксама ў «экстрэмісцкі» спіс дадалі YouTube-канал і старонкі праекту «ByLOL», старонкі ў Threads «belarusnovosti2», «igorkuley», «alex_anderlukashenko1954», «BGmedia | Брест | Новости», старонкі ў Instagram «alex_anderlukashenko1954», «auhen-_sidoryk», «dimaradzievsky», Telegram-канал «Беларуская афiша», а таксама старонку ў TikTok «Беларусь | Без фильтров».
Вайскоўца з роты ганаровай варты асудзілі да 3 гадоў «хіміі»
31-гадовага Максім Сямітка асудзілі ў Віцебскім абласным судзе паводле ч. 1 і 2 арт. 361-4 КК — «садзейнічанне экстрэмісцкай дзейнасці».
Паводле інфармацыі «Гомельская Вясна», Сямітку прызначылі тры гады абмежавання волі з накіраваннем.
Пасля службы ў войску ён пайшоў працаваць у міліцыю. З ліпеня 2016 года служыў у Дэпартаменце аховы МУС. Быў міліцыянерам-кіроўцам у спецыяльным батальёне, які займаецца аховай дыпламатычных прадстаўніцтваў. У 2019 годзе атрымаў званне старшага сяржанта міліцыі.
У Гродне прызналі «экстрэмісцкім» сімвал Бафамета
16 лютага суд Ленінскага раёна Гродна прызнаў «экстрэмісцкай» выяву «Сігіл Бафамета» — перавернутую пентаграму з галавой казла або барана і іншымі сімваламі.
Паводле сцвярджэнняў прапагандысцкіх рэсурсаў, гэты сімвал нібыта выкарыстоўваецца для пагроз тэрактаў у школах, прапаганды забойстваў, гвалту і суіцыду.