Святлана Ціханоўская: «Я гатова браць на сябе адказнасць і быць вашым голасам, каб правесці сумленныя выбары»

Дэмакратычная лідарка Беларусі на фоне чутак пра дрэнны стан здароўя Лукашэнкі выказалася пра тое, у якой сітуацыі можа аказацца краіна пасля смерці альбо сыходу яе аўтарытарнага кіраўніка і якія небяспекі яна бачыць у гэтым выпадку.

— Ведаеце, за 28 гадоў у многіх беларусаў у галаве хоць раз праскоквала думка: а што будзе, калі Лукашэнка ўсё? І, вядома, на розум адразу прыходзіць думка пра шампанскае і свята для ўсёй краіны.

Сярод яго «эліты» пачнецца самая сапраўдная барацьба. Ні пра якое адзінстве сярод іх у гэты перыяд думаць не варта. Ужо цяпер існуе напружанне паміж рознымі па настроі і адносінах да рэпрэсій «галінамі» рэжымнай улады. Але самая іх вялікая праблема ў тым, што яны гадамі спадзяваліся на Лукашэнку. Сваім становішчам яны абавязаны яму. Калі яго не стане, увесь уплыў гэтай «эліты» будзе вельмі малым — а амбіцыі велізарнымі.

Сёння ў іх яшчэ ёсць магчымасць сказаць, што гэта Лукашэнка вінаваты ў рэпрэсіях, смярцях і незаконным захопе ўлады. Але потым гэтай магчымасці ўжо не будзе.

У гэты момант сапраўдная ўлада і голас павінны належаць беларускаму народу. Таму што менавіта тады будзе вырашацца яго лёс і лёс усёй краіны. І менавіта ў гэты момант павінны адбыцца перамовы і прызначыцца новыя выбары — каб вырашыць палітычны крызіс і нарастаючы раскол у краіне.

У дэмакратычных сіл ужо распрацавана стратэгія пераходнага перыяду. Калі мы скончым яе абмеркаванне, будзе пушчана ў доступ публічная версія.