Журналіста Кірыла Пазняка асудзілі, а КДБ ціснуў на святара праз прыхаджан. Хронікі рэпрэсій 26 чэрвеня
Новыя палітычныя прысуды, сведчанні пра ціск на ксяндза Генрыха Акалатовіча праз ягоных прыхаджан, новыя выпадкі пераследу і папаўненне спісу «экстрэмістаў». Сабралі галоўнае пра палітычны пераслед у Беларусі за апошнія дні.
Журналіста Кірыла Пазняка асудзілі на 3,5 года калоніі, яго дачку Яніну таксама пазбавілі волі
26 чэрвеня Мінскі гарадскі суд вынес прысуды палітвязням Кірылу Пазняку і ягонай дачцэ Яніне.
Журналіста асудзілі да трох з паловай гадоў пазбаўлення волі. Пакуль невядома, які тэрмін атрымала ягоная дачка. Раней дзяржаўнае абвінавачанне прасіла прызначыць Кірылу Пазняку тры з паловай гады пазбаўлення волі, а Яніне — тры гады.
Акрамя таго, Кірыл Пазняк павінен заплаціць штраф у памеры 550 базавых велічыняў (24 750 рублёў).
Бацьку і дачку абвінавацілі паводле артыкулаў аб стварэнні «экстрэмісцкага фармавання» і «дыскрэдытацыі Рэспублікі Беларусь».
Паводле новых сведчанняў, КДБ ціснуў на ксяндза Генрыха Акалатовіча праз ягоных прыхаджан
Хрысціянская Візія апублікавала новыя падрабязнасці справы ксяндза Генрыха Акалатовіча са спасылкай на былых палітвязняў, якія перасякаліся з ім у СІЗА і калоніі. Сам святар пасля вызвалення не каментуе справу — маўчанне было адной з умоваў ягонага вызвалення.
Паводле сведчанняў, двух прыхаджан затрымалі адначасова са святаром і каля дзевяці месяцаў утрымлівалі ў СІЗА КДБ, дамагаючыся паказанняў пра нібыта сустрэчы Акалатовіча з замежнымі дыпламатамі. Крыніцы сцвярджаюць, што следчы выкарыстоўваў гэтых людзей для ціску на святара.
У матэрыяле таксама ўпершыню называецца імя верагоднага следчага па справе — супрацоўніка КДБ Аляксандра Казеева.
Мінімум 27 беларускіх вайскоўцаў утрымліваюцца ў месцах няволі па палітычных прычынах
Паводле звестак праваабарончага цэнтра «Вясна», пасля падзей 2020 года і пачатку поўнамаштабнай вайны ва Украіне не менш за 68 беларускіх вайскоўцаў сталі фігурантамі палітычна матываваных крымінальных спраў.
Паводле праваабаронцаў, цяпер як мінімум 27 з іх знаходзяцца ў месцах пазбаўлення волі. «Вясна» таксама паведамляе, што пераслед вайскоўцаў працягваецца.
Стала вядома пра ціск на палітзняволеных анархістаў у мазырскай ПК-20
Пра гэта паведаміла ініцыятыва ABC Belarus.
Паводле яе інфармацыі, Ігар Аліневіч знаходзіцца ў памяшканні камернага тыпу без права на спатканні, тэлефонныя размовы, перадачы і грашовыя пераводы.
Мікіту Дранца рэгулярна змяшчаюць у штрафны ізалятар. Паводле праваабаронцаў, з красавіка ён правёў там ужо больш за 70 сутак.
Арцёма Салаўя таксама перыядычна змяшчаюць у ШІЗА.
Прадпрымальніка і байкера з Гомеля асудзілі паводле артыкула аб «садзейнічанні экстрэмісцкай дзейнасці»
У Гомельскім абласным судзе асудзілі 59-гадовага гамельчука Вячаслава Гарбачова паводле частак 1 і 2 артыкула 361-4 Крымінальнага кодэкса («садзейнічанне экстрэмісцкай дзейнасці»).
Паводле «Гомельскай Вясны», справа можа быць звязаная са «справай "Гаюна"». Канчатковы прысуд пакуль не вядомы, але, паводле праваабаронцаў, ён, імаверна, не прадугледжвае пазбаўлення волі.
Супраць Арцёма Літвіненкі распачалі спецвытворчасць
41-гадовага Арцёма Літвіненку збіраюцца судзіць завочна.
Яму інкрымінуюць распальванне варожасці, заклікі да санкцый, абразу Лукашэнкі і прадстаўніка ўлады. Следчы камітэт заклікае яго вярнуцца ў Беларусь і з'явіцца да следчага.
МУС дадало яшчэ 17 чалавек у спіс «экстрэмістаў»
26 чэрвеня МУС абнавіла «Пералік грамадзян Беларусі, замежных грамадзян або асоб без грамадзянства, якія маюць дачыненне да экстрэмісцкай дзейнасці».
У спіс дадалі яшчэ 17 чалавек. Паводле МУС, цяпер у ім 6745 прозвішчаў.
Сярод новых фігурантаў — завочна асуджаны былы дырэктар Рэспубліканскага цэнтра алімпійскай падрыхтоўкі па фрыстайле Вадзім Крывашэеў.