ІІХФ не задаволіла скаргу Беларускай федэрацыі хакея на адхіленне зборных ад спаборніцтваў

Незалежны дысцыплінарны савет Міжнароднай федэрацыі хакея (ІІХФ) адхіліў скаргі федэрацый хакея Расіі і Беларусі на рашэнне аб адмове ў допуску нацыянальных зборных да міжнародных спаборніцтваў.

Пра гэта паведамляе афіцыйны сайт ІІХФ.

Камісія адзначыла, што апеляцыі адхіленыя, бо ранейшыя пастановы былі прызнаныя не санкцыяй, а рэалізацыяй палітыкі бяспекі для ўсіх удзельнікаў спаборніцтваў, якая не носіць дыскрымінацыйны характар.

Таксама дысцыплінарны савет вынес рашэнне на карысць ІІХФ ў адкліканні ў Расіі правоў на правядзенне моладзевага і дарослага чэмпіянатаў свету 2023 года, а таксама з нагоды рашэння не прызначаць расійскіх арбітраў на міжнародныя турніры.

Зборныя Расеі і Беларусі ўжо прапусцілі ЧС-2022, які адбыўся ў траўні ў Фінляндыі.