Яшчэ адзін беларус загінуў, вызваляючы Украіну

Сёння батальён Кастуся Каліноўскага панёс вялізную страту: загінуў камандзір роты Павал «Волат».

Падчас аперацыі па вызваленні ўкраінскай вёскі ад рускіх захопнікаў атрымаў смяротнае параненне камандзір роты, ваяр Павал “Волат”. У крытычным стане яго спрабавалі давезці да шпіталя, але не паспелі.
«"Волат" быў сапраўдным ваяром-легендай: быў паранены шмат разоў, але кожнага разу Павал падманваў смерць – і кожнага разу вяртаўся ў строй.
“Волат” не вельмі любіў здымацца, таму пасля яго не засталося багата фота ці відэа. Але засталася памяць. Памяць тых, каго ён ратаваў у баях, хто абавязаны ягонай мужнасці сваім жыццём. Памяць ваяроў яго роты, у якой ён быў стрыжнем і сэрцам. Памяць тых, каго ён бараніў», — узгадваюць паплечнікі ваяра.